Aqtóbede jas jigitti óltirip, aýrýhana dálizine tastap ketken
AQTÓBE. QazAqparat – Aqtóbede jas jigitti óltirgen kúdiktiler ony aýrýhana dálizine tastap ketken, dep habarlaıdy QazAqparat tilshisi.
Oqıǵa Aqtóbe oblysynyń Alǵa aýdanynda boldy. Júrek tusynan pyshaq jaraqatyn alyp, mert bolǵan jas jigitti kúdiktiler aýrýhana dálizine tastap, ózderi qashyp ketken. Aýrýhananyń kezekshi qyzmetkeri úsh adamnyń qara tústi kólikpen kelgenin polıtsııaǵa habarlaǵan.
«Alǵa aýdandyq polıtsııa bólimshesiniń kezekshi bólimi barlyq tártip saqshylaryna habar berdi. Patrýl polıtsııa rotasynyń eki qyzmetkeri Mahambet Sadyqov pen Berdibek Bekqalı tas joldy kúzetý kezinde barlyq qara tústi kólikterdi toqtatty. Kóp uzamaı Bestamaq aýylyna kirer tusta úsh er adam mingen qara-kók tústi «Leksýs» avtokóligi toqtatyldy. Olardyń is-áreketi polıtsııa qyzmetkerleriniń kúdigin týǵyzdy. Kólikti tekserý kezinde kúdiktilerdiń biri janjal barysynda jas jigitke pyshaq salǵanyn, marqumnyń oqıǵa ornynda kóz jumǵanyn aıtyp, kinásin moıyndady. Sol jerdi pyshaq tárkilendi», - dep habarlady oblystyq PD baspasóz qyzmeti.
Aıta keteıik, Qylmystyq kodekstiń «Adam óltirý» baby boıynsha is qozǵaldy. Kúdikti ýaqytsha qamaý ızolıatoryna qamaldy.
