Aqtóbede «Jas saqshy» synybynyń túlekteri arnaıy sertıfıkat aldy
AQTÓBE. KAZINFORM — Olar endi zańgerlik salany tańdap, polıtsııa qyzmetkeri atana alady. Sertıfıkat joǵary oqý oryndaryna túsýge múmkindik beredi.
Aqtóbe qalasy Farıza Ońǵarsynova atyndaǵy № 41 mektep-gımnazııasynda túlekterge attestat tapsyrý rásimi ótti. Aqtóbe oblystyq polıtsııa departamentiniń bastyǵy Qaıyrken Álıev «Jas saqshy» synybynyń túlekterine sertıfıkat tapsyrdy. Olardyń bári mektepte quqyq qorǵaý salasynyń jumysyn bilip ósti.
— «Jas saqshy» qatarynda júrip biz Otandy súıýdi, tártip pen jaýapkershilikti, dostyq pen adaldyqty baǵalaýdy úırendik. Bul jyldar bizdi shyńdap, bolashaqqa senimmen qadam basýǵa úıretti. «Jas saqshy» synybynyń oqýshysy bola júrip, tártip pen patrıotızmdi basty qundylyq etip, ózge oqýshylarǵa úlgi bolýǵa tyrystyq. Bul biz úshin úlken maqtanysh ári ómirlik ustanymǵa aınaldy, — dedi Eraly Azamat.
Aıta keteıik, «Jas saqshy» jobasy oqýshylary qoǵamdyq, sporttyq jáne áskerı-patrıottyq is-sharalarǵa belsendi qatysty. Jalpy Aqtóbe oblysy boıynsha búgin 11 myńnan astam túlek attestat aldy. Onyń 816-y «Altyn belgi» ıegeri bolsa, 719-y úzdik attestat aldy. Al Aqtóbe qalasynda bıyl 25 egizder mektep bitirdi.
Buǵan deıin habarlaǵanymyzdaı, aldaǵy onjyldyqta eńbek naryǵy ózgeriske ushyrap, tehnologııamen baılanysty mamandyqtardyń mańyzy burynǵydan arta túsedi. Jasandy ıntellekt pen mashınalyq oqytý, fınteh ınjenerııasy, kıberqaýipsizdik pen jańartylatyn energııa salalaryndaǵy mamandar suranysqa ıe baǵyttardyń qataryna kirmek.
