Aqtóbede jas mamandar forýmy ótip jatyr
AQTÓBE. QazAqparat - Aqtóbege elimizdiń batys óńiriniń jáne Qyzylorda men Qostanaıdyń jastary jınaldy. Jastar kásip bastaý, erikti bolý tetikterin úırendi, dep habarlaıdy QazAqparat tilshisi.
Aqtóbede «Básekege qabiletti jas maman - jarqyn bolashaq kepili» atty óńirlik jas mamandar forýmy ótip jatyr. Elbasy Nursultan Nazarbaev Joldaýda adamı kapıtal týraly aıtyp, tegin tehnıkalyq bilim berý, kásipkerlikti damytý tapsyrmasyn bergen bolatyn. Forým óńir jastary úshin tájirıbe almasý alańyna aınalyp, olar kásip bastaý, ınnovatsııalyq tehnologııany ıgerý, ǵylymdy damytý, bilimdi jetildirý, eriktilerdiń jumysy men belsendilikti arttyrýdy úırendi. Jastar ózara baılanys ornatty.
«Jas mamanǵa baǵyt-baǵdar berý úshin forýmǵa ár óńirdiń belsendi azamattary shaqyryldy. Ár memlekettiń bolashaǵy - jastar, jas mamandar. Sondyqtan jastar aldymen mamandyq tańdaýda qatelik jibermeýi tıis. Mamandyq adamǵa unaǵanda ǵana jumys tabysty bolady. Jumysqa yntamen baryp, úlken maqsattarǵa jetý mańyzdy. Al jaqsy maman bolýy úshin jaýapkershilik kerek. Jumysta bári jaýapkershilikke baılanysty. Maman ýaqytpen sanaspaı jumys istep, tapsyrmany tııanaqty oryndaǵany durys. Sonda ǵana basshy óz jumysshysyn baǵalaıdy»,- dedi Aqtóbe oblysy ákiminiń orynbasary Erbol Nuǵalıev.
Jastarmen kezdesý kezinde únemi bilimdi jetildirý, zamanaýı tehnologııany ıgerý, aqparattyń qajettisin paıdalanyp, ýaqytty tıimdi uıymdastyrý týraly aıtyldy. 
Jastar erikti bolý, adamdarǵa óz erkińmen kómek kórsetip, qaıyrymdylyq isterge aralasý týraly saýal qoıdy. Aqtóbege kelgen «EHRO-2017» shtabynyń menedjeri Lıaılıa Alı «QR eriktiler qozǵalysyn damytýdyń negizgi baǵyttary» taqyrybyn qamtydy.
«EKSPO kórmesine kelip, baılanys ornatqan azamattardan Qazaqstan jastary týraly suradym. Sheteldikter qazaqstandyq jastardyń tildi tez meńgeretinin, eki tildi qatar biletinimizdi erekshe atap ótedi. Bizder úshin aımaqtarda ótetin forým asa mańyzdy. Aımaq jastary ózara aralasyp, bir elde ómir súretinimizdi, bir qoǵamda júrgenimizdi naqty biledi. Olar forýmda bilgenin zamandastaryna aıtyp, olardy yntalandyrady»,- dedi erikti Lıaıla Alı.
Forým kezinde bıznesti damytý menedjeri Danııar Túlekov kásipkerlik, sheshendik óner jattyqtyrýshysy Lıaıla Islamova «Sheshendik óner jáne synı oılaý», «Aktıýbınskıı vestnık» gazetiniń bas redaktory Aıgúl Nurkeeva «BAQ-pen qalaı jumys isteý kerek» taqybyryn qamtydy.
Aıta keteıik, Aqtóbe oblysy turǵyndarynyń 26 paıyzy jastar. Jastardyń basym bóligi qalada turady. Aqtóbe oblysynyń ákimdigi sport, mádenıet, bilim salasynda belsendilik tanytyp, jetistikke jetken jastardy jyl saıyn marapattaıdy. Arnaıy stıpendııa da taǵaıyndalyp, 285 stýdent oqý aqysyn tóleýge múmkindik aldy. 
«Jasyl el», «Dıplommen aýylǵa», «Serpin» baǵdarlamalary aıasynda jastar jumysqa ornalasyp jatyr. «Dıplommen aýylǵa» baǵdarlamasy boıynsha 300-den astam jas eńbek jolyn aýyldan bastady.
