Aqtóbede jas kásipkerlerge qaıtarymsyz grant berildi
Aqtóbe oblysynyń ákimi Ońdasyn Orazalın joba jeńimpazdarymen kezdesip, bolashaq kásipkerlerdiń bastamalaryna sáttilik tiledi.
«Álemdik naryqta úlken jetistikterge jetken isker azamattardyń kóbisi ózderińdeı jas kúninde jáne óte qarapaıym jaǵdaıda óz isterin bastaǵan. Stıv Djobs, Bıll Geıts, Mark Tsýkerberg, Djek Ma, barlyǵy da shaǵyn ǵana isten bastap, sony damyta kele úlken nátıjege jetken jandar. Ózimizdiń jerlesterimizdi alsaq ta, úlken sharýalardy dóńgeletip otyrǵan kásipker azamattarymyz jeterlik. Jastardyń qýaty-bilimi men biliginde. Osyndaı múmkindikti paıdalanyp, ýaqyttaryńyzdy izdeniste bolýǵa, sheberlikterińizdi shyńdaýǵa tıimdi paıdalaný kerek. Sebebi, bıznes álemi de úlken ǵylym. Túrli zańdylyqtary bar. Bilimderińizdi neǵurlym tez, ári tolyq ıgerseńizder, soǵurlym sizderdiń isterińiz nátıjeli bolyp, elge, jerge paıda keltiresizder»,- dedi óńir basshysy O.Orazalın.
Alǵash ret uıymdastyrylǵan jobaǵa qala, aýdandardan 78 ótinish túsken. Mentorlar men kásipkerler, depýtatattardan quralǵan komıssııa músheleri «Aýyldy kórkeıtý», «Mádenıet jáne bos ýaqytty tıimdi paıdalaný», «Otbasylyq qundylyqtar jáne dástúr», «Bilim berý kishi jobalary», «Salaýatty ómir saltyn damytý», «Ekologııa jáne abattandyrý» , «Týrızm» baǵyttary boıynsha eń ozyq ári suranysqa ıe 16 jobany maquldady. Nátıjesinde Aqtóbe qalasynan-5, Baıǵanın aýdanynan-4, Hromtaý-2, Qobda-1, Muǵaljar-1, Áıteke bı-1, Temir-1, Mártók aýdanynan-1 qatysýshyǵa 1 - 2 mln teńge aralyǵynda qarjylaı sertıfıkat tabystaldy. Jobalar arasynda ulttyq naqyshta dástúrli buıym óndirý, mal sharýashylyǵyn damytý, múmkindigi shekteýli balalarǵa aqysyz qyzmet kórsetý, energetıkalyq sýsyndar óndirý, «Eko-buıymdar» ónimin shyǵarý, ishki týrızmdi damytyp, óńirimizdiń kıeli jerlerine týrısttik marshrýt uıymdastyrý syndy jobalar ozyq dep tanylǵan.
