Aqtóbede jas daryndardyń «Klassıka-2009» halyqaralyq festıvali ashyldy
AQTÓBE. Qarashanyń 6-sy. QazAqparat /Samal Endibaeva/ - Ǵ.Jubanova atyndaǵy Aqtóbe oblystyq fılarmonııasynda oblystyq mádenıet basqarmasynyń uıytqy bolýymen búgin jas daryndardyń «Klassıka-2009» halyqaralyq festıvali bastaldy.
Oblystyq fılarmonııa dırektory Esengeldi Dúısenbaevtyń aıtýynsha, jas daryndardyń dástúrli, jyl saıynǵy festıvali jurtshylyqqa jaqsy tanymal. Aǵymdaǵy jyly qatysýshylardy tipti irikteýge týra keldi, deıdi ol.
Ekikúndik konkýrsqa 10-15 jastaǵy 60-tan astam bala qatysýda. Olar - Qazaqstan, Reseı, Ózbekstan jáne Qyrǵyzstan elderinen kelgen balalar, mýzykalyq mektepterdiń, mektepten tys birlestikterdiń oqýshylary. Festıval fortepıano, skrıpka, vıolonchel, klassıkalyq gıtara, vokal jáne horeografııa atalymdary boıynsha ótedi.
Qazylar alqasynyń quramy da ınternatsıonaldy - olar Reseı, Ózbekstan, Qyrǵyzstan elderiniń eńbek sińirgen ártisteri. Al qazylar alqasyna KSRO halyq ártisi Roza Jamanova jetekshilik etedi.
Erteń festıvaldiń ekinshi kúniniń sońynda kórermender aldynda QR halyq ártisi, QR Memlekettik syılyǵynyń laýreaty Jánııa Áýbákirova óner kórsetedi.
