Aqtóbede jas balýannyń ólimine qatysty is boıynsha qaıta saraptama taǵaıyndaldy

AQTÓBE. KAZINFORM — Polıtsııa Rahymjan Elepbergenovtiń ólimine qatysty istiń mán-jaıyn anyqtaý úshin qaıta saraptama ótkizip jatyr. Qorytyndysy belgili bolǵan soń ǵana sheshim qabyldanady.

Aqtóbe oblystyq polıtsııa departamenti jas balýan Rahymjan Elepbergenovtiń ólimine qatysty isti qylmystyq quqyq buzýshylyq bolmady dep toqtatqan edi. Ata-anasynyń shaǵymynan soń qaıta saraptama taǵaıyndaldy. 

— Qazirgi kezde saraptama taǵaıyndaldy. Saraptama qorytyndysynan soń ǵana sheshim qabyldanady, — dep habarlady Aqtóbe oblystyq polıtsııa departamentiniń baspasóz qyzmeti.

Buǵan deıin habarlaǵanymyzdaı, jas balýan Rahymjan Elepbergenov Aqtóbe oblysy Mártók aýdany Rodnıkovka aýylyndaǵy mektepte oqyp, qazaq kúresinen úıirmege qatysqan. Byltyr qazan aıynda Aqtóbe qalasyndaǵy oqý-jattyǵý jıynyna keledi. Sol kezde qarsylasy jambasqa laqtyryp, jas balýan basyn ustap, buryshta jatyp qalady. Birneshe mınýt ótkennen keıin jattyqtyrýshy ornynan kúshtep turǵyzady. Esin jımaǵan soń dalaǵa alyp shyǵady, jedel járdem shaqyrady. Anasy Gúlderaı Gadılshınanyń aıtýynsha, aldymen qalalyq aýrýhanaǵa aparyp, onda neırohırýrgııa bólimi bolmady. Keıin oblystyq balalar aýrýhanasy tasymaldap, birneshe ret ota jasalǵanymen, jas balýan 61 kúnnen keıin kóz jumdy. Ata-anasy jumysyna salǵyrt qaraǵan jattyqtyrýshynyń jazalanǵanyn surap otyr.