Aqtóbede jas ana baýyry aýyratyn jeti aılyq sábıine donor izdeıdi
Aqtóbe oblystyq balalar aýrýhanasynda birneshe aı boıy em qabyldap jatqan Ersultan Rýslannyń anasy búgin qazaqstandyqtardan kómek surady. Úsh balasynyń kenjesi Ersultan Rýslan týa bitti dertke shaldyǵyp, dárigerler «jedel baýyr aýystyrý otasyn jasaý kerek» dep sheshimge keldi. Biraq anasynyń, ákesiniń baýyry balaǵa sáıkes kelmedi. Al týǵan-týystary batyl qadamǵa baryp, kómek kórsetýge qulyqsyz.
«Balamnyń ómirine arasha túsetin meıirimdi adamdar tabylar dep kómek surap otyrmyn. Men árbir kúnimdi qorqynyshpen ótkizip júrmin. Eshkimge kiná artpaımyn, dárigerler de qoldan keler kómegin berip, tegin dárimen qamtamasyz etip otyr. Ókinishtisi meniń, ákesiniń baýyry balaǵa saı kelmedi. Máıittik donordy kútemiz, biraq onyń qaı ýaqytta bolatynyn bilmeımiz. Halyqtan kómek suraımyn, bálkim meıirimdi adamdar baýyrynyń bir bólshegin berer dep oılaımyn», - dedi jas ana Shynar Qoshtanbekova.
Qazir 7 aı boıy em qabyldap jatqan Ersultan Rýslan arnaıy kútimge alynǵan. Baýyr transplantatsııasyn júrgizýge qajetti alǵashqy ota da jasaldy. Sábı respýblıkalyq resstrge tirkelip, arnaıy analızderi alyndy.
«Bala maýsym aıynan beri arnaıy esepte tur. Ol týa bitti dertke shaldyqqan. Baýyr tserrozy dertine shaldyqqan balaǵa em júrgizildi, biraq nátıje joq. Sondyqtan sábıdiń baýyryn aýystyrý kerek dep sheshim shyǵaryldy. Qazir bala respýblıkalyq reestrge tirkeldi. Anasy men ákesiniń baýyry sáıkes kelmeı qaldy. Balaǵa úlken adamdardyń baýyryn salýǵa bolady. Keıin baýyr ósip shyǵady»,- dedi Gúljan Tólegenova.
Aıta keteıik, baýyr aýrýy ekige bólinedi. Baýyr syrtyndaǵy dertti emdeý dárigerler úshin jeńil. Al baýyr ishindegi joldardy ashý qıyn. Kishkentaı Ersultanda baýyr ishi aýrýy tirkeldi. Mindetti túrde transplantatsııa jasalýy tıis. Anasy Shynar Qoshtanbekovanyń aıtýynasha, sábıdiń damýy jaqsy. Tek ishi aýyryp, qyzýy kóterilip, jylaıdy.
«Balam jylaǵan kezde janymdy qoıarǵa jer tappaımyn. Qazaqstandyqtardan kómek suraımyn. Eger aıtyp, kómek suramasym meıirimdi jan tabylyp, kómegin berer dep úmittenemin. Bos otyryp, jylaýdan sharshadym»,- dedi Shynar Qoshtanbekova.