Aqtóbede jartylaı marafonǵa 5 myńnan astam adam qatysty
AQTÓBE. QazAqparat -Aqtóbede «CNPC-Aktobe Marathon-2018» sharasy ótti. Barlyǵy 5 myńnan astam adam 3, 10, 21 shaqyrym qashyqtyqty baǵyndyrdy, dep habarlaıdy QazAqparat tilshisi.
Aqtóbe qalasynyń 149 jyldyq mereıtoıyna oraı jeńil atletıkadan jartylaı marafon ótti. Marafon kezinde qala ákimi Іlııas Ispanov, «Aqtóbe» FK bas dırektory Samat Smaqov, depýtattar men aqtóbelik ardagerler qatysyp, qatysýshylarǵa qoldaý bildirdi. Buqaralyq sportty damytýǵa, salaýatty ómir saltyn ustanýǵa baǵyttalǵan marafonǵa Almaty, Astana, Atyraý, Oral, Aqtaý, sondaı-aq oblystyń aýdandarynan ótinim túsken. Óz mejesin baǵyndyrǵandardy óńir basshysy Berdibek Saparbaev quttyqtap, arnaıy syı usyndy.
«Memleket basshysy árbir qazaqstandyqtyń sportpen shuǵyldanýy, salaýatty ómir saltyn ustanýy kerek degen mindet qoıǵan bolatyn. Sebebi kez kelgen eldiń bolashaǵy óz azamattarynyń densaýlyǵyna baılanysty. Biz, óz kezegimizde, Prezıdenttiń tapsyrmasyn oryndaý úshin barlyq qajetti jaǵdaılardy jasaımyz. Árqaısymyz úshin densaýlyǵymyz myqty bolýy mańyzdy. Bizdiń densaýlyǵymyz eń aldymen ózimizge baılanysty. Salaýatty ómir súrip, árqashan qozǵalysta bolýǵa, sportpen shuǵyldanýǵa tıispiz», - dedi oblys basshysy Berdibek Saparbaev.
Marafonǵa barlyǵy 5 myńnan astam adam qatysty. 3, 10 jáne 21 shaqyrymdyq qashyqtyqty alǵash bop baǵyndyrǵandarǵa 50-den 250 myń teńgeniń sertıfıkattary tapsyryldy. 10 shaqyrymdyq qashyqtyqqa júgingenderdiń eń jasy 13-tegi Aısýlý Ótesin, eń úlkeni 78 jastaǵy Tóleý Orynbaev boldy. Olar da estelik syılyqtarmen marapattaldy.
