Aqtóbede jarty jylda myń adam ıt-mysyqtan zardap shekti

AQTÓBE. KAZINFORM – Buralqy ıtterdi aýlaýǵa 100 mln teńge bólindi. Qarjy tórt baǵyt boıynsha jumsalyp jatyr.

Aqtóbe oblystyq sanıtarııalyq-epıdemıologııalyq baqylaý departamenti baspasóz qyzmetiniń habarlaýynsha, bıyl 6 aıda janýarlardyń tisteýinen, tyrnaýynan, silekeıinen 1000 adam zardap shekken. Adamdar arasynda qutyrma aýrýy tirkelgen joq. 

Al Aqtóbe oblystyq veterınarııa basqarmasy basshysynyń orynbasary Berdimurat Bekjanovtyń aıtýynsha, 2025 jyly ıtti aýlaýǵa 100 mln teńge bólindi. 

- Itti aýlaýǵa 57 mln, kútip-baǵýǵa 34 mln, birdeılendirýge 2,5 mln, stereldeýge 6 mln teńge bólinip otyr. Qarjy kezeń-kezeńimen ıgerilip jatyr. Oblys boıynsha 15 myńnan astam buralqy ıt, 383 mysyq aýlandy. Onyń kóbi Aqtóbe qalasyna tıesili. Ýaqytsha kútip ustaý beketine 1500-den astam ıtti apardy. Sterıldeýden ótken soń syrǵa salady, aqparattyq júıege tirkeledi jáne óz jerine qaıta jiberiledi,- dedi Berdimurat Bekjanov. 

Aıta keteıik, byltyr ıt-mysyqty aýlaýǵa budan eki ese kóp qarjy bólindi.