Aqtóbede jaryqsyz qalǵan eki aýylǵa elektr jelisi qaıta tartylady

AQTÓBE. KAZINFORM – Muǵaljar aýdanynyń Aqsý jáne Sabyndykól aýyldarynda elektr togy tartylǵan 76 baǵana qulady. Qazir qaıta ornatý jumysy júrip jatyr.

Muǵaljar aýdany boıynsha alǵashynda 6 aýylda jaryq bolmady. Birinde jalǵansa, birinde sónip qalady, qazir Aqsý men Sabyndykól aýyldaryndaǵy baǵanany qaıta ornatý jumysy júrip jatyr. 

- Aqsý aýylynda 16, Sabyndykólde 60 baǵana qulady. Sabyndykólde shamamen 9 shaqyrym bolady. Qazirgi kezde «Energosıstema» JShS-i 2 brıgada men kranyn jiberdi. Búgin Aqsý aýylyndaǵy jumysty aıaqtasa, erteń Sabyndykóldegi jumys bastalady. Aqsýda 4 kúnnen beri jaryq bolmady. Búgin generatordy iske qostyq. Munda 200 adam turady. Al Sabyndykólde jaryq tek bir kún bolmady. Bul aýylda 22 úıde 100-den astam adam turady. Aldaǵy eki kúnde bar jumys aıaqtalady,- dedi Muǵaljar aýdanynyń ákimi Darhan Ermaǵambetov.

Onyń aıtýynsha, kún kúrt jylyp, dalany qoıý tuman basqan. Keıin shyq sekildi muz qatyp, qalyńdaı túsken. Dıametri 15 sm bolatyn muzdy kótere almaǵan sym men baǵana qulady.

- Áleýmettik nysandardyń bárinde generator bar. Byltyr bárin janar-jaǵarmaımen de qamtamasyz ettik,- dedi Darhan Ermaǵambetov.

«Energosıstema» JShS-i baspasóz qyzmetiniń habarlaýynsha, 1-6 qańtar aralyǵynda dalalyqqa jáne shalǵaı eldimekenderge 72 brıgada, 418 maman, 153 birlik tehnıka jumyldyryldy. 

- Symdarǵa muz qatyp, elektr qýatyn qalpyna keltirý jumysy uzaqqa sozyldy. Óıtkeni jelini muzdan tazartý úshin mehanıkalyq ádis qoldanyldy. Mekeme mamandary táýlik boıy kúsheıtilgen rejımdegi jumysty toqtatpaıdy. 30 jeltoqsan kúninen bastap tynymsyz jumys istep jatyr. «Energosıstema» JShS-niń kúsheıtilgen jumys tártibi 8 qańtarǵa deıin jalǵasady,- dep habarlady «Energosıstema» JShS-i baspasóz qyzmeti.

Eske salsaq, Aqtóbe oblysy Muǵaljar aýdanynda elektr symdaryna muz qatyp qaldy. Sabyndykól, Aqsý aýyldarynda baǵana qulap, jaryq sóndirildi.