Aqtóbede jaramsyz kúıge túsken bombapanany kim jóndeýi tıis
AQTÓBE. QazAqparat - Aqtóbelik kásipker óz ıeligindegi jerde ornalasqan bombapanany memleketke keri qaıtarǵysy keledi. Bul ótinishin kásipker Aqtóbe oblystyq kásipkerler palatasynda tótenshe jaǵdaılar qyzmetine jetkizdi, dep habarlaıdy QazAqparat tilshisi.
Aqtóbe qalasyndaǵy «Jańa Áljan dıirmen kombınaty» JShS bir qıyndyqty áli jeńe almaı keledi. Kompanııanyń balansynda tótenshe jaǵdaı kezinde qorǵanatyn bombapana bar. Nysan 1985 jyly salynǵan. Osy jyldar ishinde ol kádege jaramaıtyn kúıge jetken. Shyn máninde, qorǵaný orny kompanııanyń ákimshilik ǵımaratynyń jertólesinde ornalasqan. Sońǵy jyldary oǵan tolǵan sýdyń tereńdigi 2,18 metrge jetti. Kún ótken saıyn ǵımarat qabyrǵalary sógile bastady.
«Óndiris orny únemi jınalǵan sýdy soryp, tazartady. Biraq kóktem jáne kúzgi mezgilde jerasty sýy kóterilip ketedi. Qabyrǵalardy syz basyp, ylǵal ǵımaratty jaılap aldy. Jeldetkish qurylǵylary, sý, káriz qubyry iske aspaı qaldy. Bul jer adam qorǵanatyn oryn bolmaı barady. Eshqandaı sanıtarlyq talapqa saı emes. Nysandy qaıta qalpyna keltirý úshin 400 mıllıon teńgege jýyq qarjy qajet. Al kompanııada mundaı qarajat joq. Aqtóbe qalasynyń ákimdigi men oblystyq tótenshe jaǵdaılar departamentine tizimnen alyp tastaý týraly birneshe ret ótinish jazyldy»,- dedi kásipker Qanat Tapaev.
Kásipker jarylǵysh zattan qorǵanatyn oryndy tehnıkalyq tekserýden ótkizip, onyń jaramsyz ekenin rastaıtyn qujatty alǵan. Tipti, bombapanany memleketke tegin berýge daıyn.
«Tótenshe jaǵdaılar mınıstrliginiń 2014 jylǵy jarlyǵyn negizge alyp otyrmyz. Onda azamattyq qorǵaný oryndarynyń tehnıkalyq jaǵdaıy talapqa saı kelmese tizimnen alýǵa bolatyny jazylǵan. Biz kásipker quqyǵyn qorǵaý jumystaryn jalǵastyramyz»,- dedi Aqtóbe oblystyq kásipkerler palatasynyń sarapshysy Nurlan Mahambetov.
Aıta keteıik, Aqtóbe oblystyq tótenshe jaǵdaılar departamenti jerasty qorǵaný nysanyn qalpyna keltirip, keıin memleketke qaıtarýǵa bolatynyn aıtty. Biraq kásipker qalpyna keltirý jumystarynan soń ony memleketke berý shyǵyndy jumys dep otyr. Qazir bul suraq áli talqylanyp jatyr. Strategııalyq aımaqtyń qaı ýaqytta qaıta qalpyna keltiriletini, oǵan kim qarjy bóletini áli belgisiz. Aqtóbe oblystyq kásipkerler palatasy kásipkerler arasynda mundaı másele birinshi ret týyndap otyrǵanyn jasyrmady.
