Aqtóbede jappaı tóbeleske qatysqan 10 aıyptalýshy sot aldynda jaýap beredi

AQTÓBE. KAZINFORM – Aqtóbede jastar arasynda bolǵan jappaı tóbeles kezinde bireýi kóz jumyp, iste 10 kúdiktige aıyp taǵyldy. Sot keler aptada bastalady.

Aqtóbe oblystyq polıtsııa departamenti ótken jyly mamyr aıynda bolǵan qylmystyq isti tergep, sotqa joldady. Іs materıalyna súıensek, eki top ózara tóbelesedi. Tóbeles kezinde pyshaq ta, atys qarýy da paıdalanylǵan. Saldarynan kámeletke tolmaǵan bir bala kóz jumdy, 8-i aýrýhanaǵa tústi.

- Marqumdy avtokólikpen qaǵyp, oǵan kóptegen pyshaq jaraqatyn salǵan. Tergeýdi oblys prokýratýrasy baqylaýǵa alyp, protsestik prokýrorlar toby taǵaıyndaldy. Polıtsııa qyzmetkerleri jedel túrde qylmysqa qatysy bar 10 kúdiktini ustap, olar ýaqytsha ustaý abaqtasyna qamaldy. Olarǵa kúzetpen ustaý túrindegi bultartpaý sharasy sanktsııalandy. Іs Aqtóbe oblysynyń qylmystyq ister jónindegi mamandandyrylǵan aýdanaralyq sotyna joldandy,- dep habarlady Aqtóbe oblystyq prokýratýrasy.

Aqtóbe oblystyq soty baspasóz qyzmetiniń habarlaýynsha, Qylmystyq kodekstiń 194 baby 2 bóligi 2 tarmaǵy (Adamdar tobymen qorqytpy alý), 28 baby 3 bóligi, 99 babynyń 2 bóliginiń 1, 6, 7, 8, 9 tarmaqtary ( Eki nemese odan da kóp adam, qaýipti tásilmen jasalǵan, qorqytyp alýmen ushtasqan, buzaqylyq nıetpen adam óltirý), 99 baby 2 bóliginiń 1,5,7,9,14 tarmaqtary ( Eki nemese odan kóp adam asa qatygezdikpen jasalǵan, adamdar tobymen, buzaqylyq nıetpen, kámeletke tolmaǵan adamdy óltirý) baptary boıynsha 10 aıyptalýshyǵa qatysty is tústi. Іs 14 naýryz kúni Aqtóbe oblystyq qylmystyq ister jónindegi mamandandyrylǵan aýdanaralyq sotynda qaralady.

Eske salsaq, 28 mamyr kúni Aqtóbe qalasynyń qurylǵan kúni ótti. Sol kúni túnde 18-22 jas aralyǵyndaǵy jigitter arasynda jappaı tóbeles boldy. Tóbelestiń negizgi sebebi aıtylmady.