Aqtóbede jappaı tóbeles kezinde kóz jumǵan bozbalanyń ákesi tergeýdi ádil ótkizýdi surady
AQTÓBE. KAZINFORM — Álıhan Jánibektiń ákesi Jánibek Álımanov áli de qala ishinde aýdan-aýdan bolyp tóbelesetinder bar ekenin aıtty. Bul oqıǵada da bir emes, bir top jasty qylmystyq jaýapqa tartý qajet dep sanaıdy.
Ulynan aıyrylǵan Jánibek Álımanov Aqtóbe oblysynyń ákimi Ashat Shaharovqa, oblys prokýrory Marat Ábishevke, oblystyq polıtsııa departamentiniń bastyǵy Qaıyrken Álıevke úndeý jasady. Onyń uly Álıhan Jánibek naýryzdyń 19-nan 20-na qaraǵan túni kisi qolynan qaza tapty. Bul bir emes, toptyń isi dep sanaıdy ákesi.
— Shalqarda burynnan bar jastar arasyndaǵy jikshildiktiń qurbany boldy. Jasóspirimderdiń aýdan-aýdanǵa bólinip, toptasyp tóbelesýi Shalqarda kóp jyldan beri joıylmaı, tyıylmaı kele jatqan problema. Biraq osy kezge deıin qanshama bala qaza tapsa da, toptasyp tóbelesýge tyıym bolmaı tur. Keı málimetterge qaraǵanda, shalqarlyq jasóspirimder osy oqıǵa bolardan buryn birneshe kún qatarynan ózara shekisip júrgen. 20 naýryzǵa qaraǵan túni bir top bala jınalyp kelip, olardyń biri ulymnyń júrek tusyna pyshaq suǵyp alady. Jastar jaýapkershilikten qorqyp bet-betine qashyp ketkende Álıhan qansyraǵan kúıi kóshede jalǵyz qalyp qoıǵan. Kezdeısoq adam kórip qalyp, aýrýhanaǵa apara jatqanda jolaı jan tapsyrady. Osyǵan oraı sizderge Úndeý joldaýǵa májbúrmin, — dedi Jánibek Álıhanov.
Onyń aıtýynsha, oqıǵa ornynda eki taraptan keminde 14-15 jas jigit bolǵan. Al qazir bir ǵana kúdikti qamaýǵa alynǵan.
— Qalǵan qatysýshylardyń áreketine tıisti quqyqtyq baǵa berilmeı otyr. Alaıda oqıǵanyń mán-jaıy bul árekettiń top bolyp jasalǵanyn jáne qoǵam úshin asa qaýiptiligin kórsetedi. Sondyqtan qylmystyq istiń durys dárejelenýin qamtamasyz etýdi, oqıǵaǵa qatysqan barlyq tulǵany zań aıasynda jaýapkershilikke tartýdy, tergeýdiń tolyq, jan-jaqty jáne obektıvti júrgizilýin qamtamasyz etýdi, maǵan zańda belgilengen tártippen tolyqqandy aqparat berýdi suraımyn. Eń basty talabym—toptasyp jasalǵan qatygezdik ekenin eskere otyryp, qylmystyń aýyr nemese asa aýyr sanatqa jatqyzylýyn suraımyn! Qatysýshylar tóbeleske shyqpaı turyp, pyshaqty ózderimen birge alyp kelgen. Demek bul— aldyn-ala josparlanǵan áreket. Biz Álıhandy 22-naýryz kúni aqtyq saparǵa shyǵaryp salamyz. Bul tek meniń otbasymnyń qaıǵysy emes. Qazaǵa qaıyr aıta kelgen júzdegen adam Shalqar jasóspirimderi arasyndaǵy jikshildikti aıyptap otyr. Men bul jaǵdaıdyń jabýly qazan kúıinde qalǵanyn qalamaımyn! Ádildik ornaıtynyna senemin, — dedi Shalqar qalasynyń turǵyny Jánibek Álıhanov.
Buǵan deıin habarlaǵanymyzdaı, Aqtóbede jastar arasynda jappaı tóbeles bolyp, bireýi kóz jumdy. Polıtsııa janjal ishinde bolǵan barlyq kúdikti anyqtalyp, atsdandyq bólimge jetkizilgenin habarlady.
