Aqtóbede janyp ketken 9 qabatty úı jóndelip, turǵyndar óz baspanasyna oraldy
Aqtóbe qalasynyń ákimi Іlııas Ispanov búgin órt shyǵyp, páterleri turýǵa jaramsyz bolyp qalǵan turǵyndarmen kezdesti. Arada 2 aı ótkende páterdiń bári jóndelip, demeýshiler jıhaz jáne turmystyq tehnıka satyp alyp berdi.
«Arnaıy komıssııa tekserýinen soń 30 páterge ártúrli deńgeıde zaqym kelgeni anyqtaldy. Barlyǵy 29 páterge tereze, esik qondyryldy. Sonymen qatar, 19 páterge ishki jóndeý jumysy júrgizildi. Qazirgi kezde 16 páterdiń jóndeý jumysy tolyq aıaqtalyp, turǵyndar óz mekenine ornalasty. Al úsh páterde jóndeý jalǵasyp jatyr. Bári de qurylys kompanııalarynyń esebinen, demeýshilikpen júrgizildi. Komıssııa zaqym kelgen turmystyq tehnıkany anyqtap, barlyǵyn aqtóbelik kásipkerlerdiń kómegimen alyp berýge múmkindik jasady», - dedi qala ákimdigi apparatynyń tótenshe jaǵdaılar jónindegi bólim basshysy Bekbolat Nurashev.
Ári janyp ketken jıhazdyń ornyna jańasy alyndy. Al órt shyqqan 69 páterdiń esik-terezesi salynyp, jıhazy jasalyp jatyr.
Aıta keteıik, 4 qazan kúni Aqtóbe qalasynyń ortalyǵyndaǵy 9 qabatty úıden órt shyqty. Jedel arnaıy komıssııa qurylyp, shyǵyndy esepteý jumysy júrgizildi. Al órt kezinde turǵyndardy qaýipsiz jerge shyǵarýǵa kómektesken stýdentter arnaıy marapattaldy. Olardyń ekeýi de stýdent bolyp shyqty.