Aqtóbede Jánibek han, Sháken Aımanov, Saýran, Samuryq kósheleri paıda boldy
AQTÓBE. QazAqparat -Aqtóbede birqatar kóshelerge jańa ataý berilip, eski ataýlar ózgertildi, dep habarlaıdy QazAqparat tilshisi.
Aqtóbe oblysynda birneshe jyl boıy ataýsyz turǵan kóshelerge ataý berildi. Olar qazir Balýan Sholaq, Qajymuqan Muńaıtpasuly, Qus joly, Jeti qazyna, Keleshek, Іnjý-marjan, Bes qaınar, Balbyraýyn, Sulýtóbe, Toǵaıly, Saryarqa, Taıqazan, Keńjaılaý, Aqbesik, Bazarly dep atalady. Osyndaı 95 kóshe bar. Sonymen qatar, Pýgachev - Muhtar Áýezov, Stepan Razın - Máshhúr Júsip Kópeıuly, Roza Lıýksembýrg - Dına Nurpeıisova, Sovhoznyı proezd - Úsh taǵan, Şors - Araı kóshesi, Demıan Bednyı - Qasym han, Koltsov - Oral, Ýdarnyı - Temirqazyq, Kobozev - Býrabaı, Aǵaıyndy Korostylevtar - Kereı han atyndaǵy kóshe bolyp ózgerdi. Osy jolmen eski kóshe ataýlary Jánibek han, Sháken Aımanov, Saýran, Samuryq, Іzgilik tuıyq kóshesi boldy.
«Aqtóbe oblystyq onomastıka komıssııasy ataýsyz quramdas bólikterge ataý berý týraly 95, qaıta ataý týraly 79, eldi mekenderdi qaıta ataý týraly 2, barlyǵy 176 usynysty qarap, onyń 155-ine oń qorytyndy berdi. Sondaı-aq 224 ataý respýblıkalyq onomastıka komıssııasynyń oń qorytyndysyn aldy. Qazirgi tańda oblys toponımıka keńistigindegi qazaq tilindegi ataýlardyń úlesi 93 % qurady. 2017 jylmen salystyrǵanda ótken jyly oblystaǵy ıdeologııalyq turǵydan eskirgen ataýlar úlesi eki esege azaıdy», - dedi Aqtóbe oblystyq tilderdi tilderdi damytý basqarmasynyń basshysy Gúlaıym Tólebaeva.
