Aqtóbede janarmaı beketindegi jarylysqa baılanysty komıssııa quryldy
AQTÓBE. QazAqparat - Aqtóbe qalasyndaǵy janar-jaǵarmaı tasıtyn kólik jarylysyna qatysty tergeý jumystary bastaldy, dep habarlaıdy QazAqparat tilshisi.
Aqtóbeniń óndiristik aýmaǵyndaǵy bazada jarylys bolyp, eki adam jansaqtaý bólimine tústi. Buǵan deıin habarlaǵanymyzdaı, naýqastardyń jaǵdaıy aýyr. Al eńbek ınspektsııasy tergeý jumystaryn bastady.
«Qazir komıssııa qurylyp, tergeý jumystary júrip jatyr. Barlyǵy 3 adam zardap shekti. Komıssııa quramyna tótenshe jaǵdaılar qyzmeti, órt sóndirýshiler kirgizildi»,- dedi Aqtóbe oblystyq eńbek ınspetsııasynyń bólim basshysy Jolmurat Jubanazarov.
Aıta keteıik, 38 jastaǵy operator Serik Palvanovtyń 5 balasy bar. Qazir naýqastardyń týǵan-týystary aýrýhanada júr. Olar túste jáne keshkilik jansaqtaý bólimine baryp, jaǵdaıyn bilip otyrǵanymen, dárigerler kúıiktiń óte aýyr ekenin eskertti.
