Aqtóbede jańadan salynyp jatqan balabaqsha qabyrǵasynan dala kórinip tur

AQTÓBE. KAZINFORM – Oıyl aýdanynda 150 oryndyq balabaqsha salynyp jatyr. Alaıda turǵyndar qabyrǵasy syr berip, dala kórinip turǵanyn aıtty.

Byltyr sý tasqynynan soń óńirdegi bilim berý salasynda 5 nysan salý josparlandy. Qurylys jumystaryna 6,4 mlrd teńge qarjy suraldy. Nysannyń úsheýi Oıyl, ekeýi Muǵaljar aýdanynda. Oıyl aýdanyndaǵy 150 oryndyq balabaqsha – sol jospardyń biri. Joba quny – 1,4 mlrd teńge. Tapsyrys berýshi – Aqtóbe oblystyq qurylys, sáýlet jáne qala qurylys basqarmasy. Al merdiger - «BF. Elıt - Qurylys» JShS. Eki aradaǵy kelisim byltyr shildede jasaldy. Nysandy bıyl paıdalanýǵa berý josparlanǵan. Alaıda eki qabatty balabaqsha qabyrǵasynan jaryq paıda boldy. Turǵyndar jibergen vıdeodan dalany da kórýge bolady.

- Qurylys-montaj jumystary barysynda balabaqsha ǵımaratynyń (A blogy) qabyrǵalarynda tik jaryqtar túrindegi aqaýlar bar ekendigi anyqtaldy. Anyqtalǵan kemshilikter boıynsha sáýir aıynda tehnıkalyq tekserý taǵaıyndalyp, qorytyndysy alyndy. Tehnıkalyq tekserý kezinde qabyrǵa jaryǵynyń ulǵaıý pishini men baǵytyn baqylaý maqsatynda qaǵaz, gıps jáne shyny baqylaý maıaktary ornatylyp, qajetti ýaqytqa deıin baqylaýǵa alyndy. Nátıjesinde syrtqy kúshtiń áserinen jaryqshanyń kólemi men formasy deformatsııaǵa ushyramady. Qorytyndyǵa sáıkes atalǵan kemshilik joıylady. Qazirgi tańda qurylys jumystary júrgizilip jatyr, - dep habarlady oblys ákiminiń baspasóz qyzmeti.

Eske salsaq, Aqtóbede byltyrǵy sý tasqyny kezinde buzylǵan, jaramsyz bolǵan úıler bıyl súrilýi tıis.