Aqtóbede jańa jyl túni 40 jedel járdem brıgadasy jumysqa shyǵady

Ádette 36 brıgada qyzmet kórsetetin. Jyl saıyn mereke kúni shaqyrtýlar kóbeıedi. Osy rette dárigerler de kezekshilikke shyǵýǵa májbúr. Feldsher Azamat Zakenov mereke kúnderi kezekshilikke shyqty. Aıtýynsha, osynda eńbek etken 6 jyl ishinde biraz meıramdy jumysta ótkizgen. Degenmen bul mamandyqty tańdaǵanyna ókingen emes. Syrqat jańǵa paıdam tıse bolǵany deıdi. Ras, mereke kúnderi shaqyrtýlar kúrt kóbeıedi. Azamattyń brıgadasy bárine daıyn. Sý jańa kólik, qajetti dári-dármek bar.

 «Jurt meıramdy toılap jatqanda biz jumysta bolamyz. Oǵan ábden úırenip alǵanbyz. Jumystyń aty jumys. Arqany keńge salýǵa bolmaıdy. Ásirese, bizdiń qyzmettiń jaýapkershiligi óte joǵary. Jany qysylǵan jan bizdi kútedi. Dáriger retinde bir tilegim, turǵyndar qaýipsizdik jaǵyn oılasa eken. Aşy sýdy da ishpegen durys», - deıdi jedel járdem qyzmetiniń feldsheri Azamat Zakenov.

Dárigerlerdiń aıtýynsha, mereke kúnderdiń qıyndyǵy az emes. Kóshede kólik kóbeıip, tez jetýge kedergi bolyp jatady. Qalanyń jańa aýdandarynda mekenjaıdy tabý qıyn. Kóńil qýantatyny, aşy sýdan ýlaný deregi azaıǵan. Qysqasy, merekelik qarbalas qyzmetke de áserin tıgizedi. Degenmen syrqatqa der kezinde jetý - dárigerlerdiń mindeti. Bul qyzmetke ádette táýligine 3000 shaqyrtý túsetin bolsa, meıram kúnderi 5000-ǵa deıin qońyraý bolady.

«Bizdiń dárigerlik mindetimiz. Eger kerek bolsa, taǵy brıgada qosamyz. Aýa raıyna baılanysty jaraqat alyp jatqandar kóp», - dep atap ótti jedel járdem qyzmetiniń bas dárigeri Marat Janqulov.

Jańa jyl merekesinde 20 dáriger, 20 feldsher kezekshilikke shyǵady. 40 kólik daıyn tur. Koll-ortalyq kúndiz-túni qyzmet etedi. Qyzmetkerlerdiń merekelik kóńil kúıin kóterý úshin arnaıy sharalar uıymdastyrylǵan.

Aqtóbedegi sý jańa jedel járdem stansasynyń ashylǵanyna bir jyl bolǵan joq. Sheteldik ınvestorlardyń senimgerlik basqarýyna berilgeli kólik parki jańǵyrtyldy. Jańa ǵımarat salynyp, koll ortalyq ashyldy. 5 qosalqy stansa jumys istep tur. 2019 jyly taǵy 2 stansa paıdalanýǵa beriledi.