Aqtóbede jańa jyldan bastap sýmen jáne jylýmen jabdyqtaý tarıfi ózgeredi

AQTÓBE. KAZINFORM — Aqtóbede turǵyndar úshin sýmen qamtý tarıfi 24,70 teńgege, al jylymen qamtý 37 teńgege kóteriledi.

2025 jyldyń 1 qańtarynan bastap «Aqtobe su-energy group» AQ-y sýmen jáne jylýmen jabdyqtaý tarıfin kóteredi. Bul týraly Qazaqstan Respýblıkasy Ulttyq ekonomıka mınıstrligi tabıǵı monopolııalardy retteý komıtetiniń Aqtóbe oblysy boıynsha departamenti habarlady. 

— Sýmen qamtý tarıfi jeke tulǵalar úshin 1 tekshe metrine 129,89 teńgeden 154,57 teńgege, ıaǵnı, 24,70 teńgege kóteriledi. Al zańdy tulǵalar men bıýdjettik mekemelerge jyl basynan bastap tarıf tómendeıdi. Zańdy tulǵalarǵa 35 teńgege, ıaǵnı 464,50 teńgeden 429,95 teńge túsedi. Al bıýdjettik mekemelerge 68 teńgege, ıaǵnı qosymsha qun salyǵyn qosqanda ár tekshe metrine 914,84 teńgeden 846,80 teńgege arzandaıdy, — dedi Qazaqstan Respýblıkasy Ulttyq ekonomıka mınıstrligi tabıǵı monopolııalardy retteý komıtetiniń Aqtóbe oblysy boıynsha departamentiniń basshysy Erlan Dúısen.

Tarıf jyl saıynǵy josparǵa saı kóterilgen. Sonymen birge toǵyspaly sýbsıdııalaý toqtatyldy. Endi aldaǵy ýaqytta barlyq tutynýshylar úshin tarıf teńestiriledi. Al 2029 jylǵa qaraı barlyǵyna ortasha tarıf engiziledi.

— Jylýmen qamtý tarıfi barlyq sanat úshin 18% kóteriledi. Máselen ortalyq jylýmen qamtý jeke tulǵalar úshin ár sharshy metrine qosymsha qun salyǵyn qosqanda 37 teńgege qymbattaıdy. ıAǵnı, 198,48 teńge edi, endi 235,06 teńge bolady. Tarıftiń kóterilýine birneshe sebep áser etti. «Aqtobe su-energy group» AQ-y 2024 jyly jumysshylarynyń eńbekaqysyn ósirdi. Ekinshiden, 2024 jyldyń 1 maýsymynan bastap taýarly gaz baǵasy 35% joǵarylady, — dedi Erlan Dúısen. 

Bul rette Aqtóbede gazben jáne elektr toǵy tarıfi ózgermeıdi.

Eske salsaq, Aqtóbe qalasy Eset batyr turǵyn alabynda kópqabatty úı turǵyndary tońyp otyr. Olar jylytý maýsymy bastalǵaly beri jylý batareıalarynyń ysymaǵanyn aıtyp, shaǵymdandy.