Aqtóbede Jańa jyl merekesine oraı qalany bezendirýge qarjy bólinbeıdi

AQTÓBE. KAZINFORM – Aqtóbe qalasynda Jańa jyl merekesine oraı bezendirý jumysy Táýelsizdik kúninen keıin ǵana bastalady. Ortalyq alańdaǵy shyrshany qurý, bezendirýge bıyl da qarjy bólinbeıdi.

Aqtóbe qalasynda sońǵy jyldary Jańa jyldyq bezendirýge bıýdjetten qarjy bólinbeı keledi. Bıyl da burǵan deıingi shyrshalar men áshekeılerdi paıdalanady. 

- Qalanyń basty shyrshasy QR Tuńǵysh Prezıdenti atyndaǵy ortalyq mádenıet jáne demalys saıabaǵynda ornatylady. Odan basqa eki aýdannyń aýmaǵynda qoıylady. Olar: Eset batyr turǵyn alabyndaǵy sýpermarket aldy, Altyn orda turǵyn alabyndaǵy Jekpe-jek saraıy men qalalyq ákimdik aldyndaǵy Áıteke bı eskertkishiniń jany. Qalany bezendirý 16 jeltoqsannan keıin bastalady. Budan bólek qalanyń kásipkerleri óz esebinen ǵımarattary ornalasqan aýmaqtaryn Jańa jylǵa oraı bezendiredi. Qalalyq turǵyn úı-kommýnaldyq sharýashylyq, jolaýshylar kóligi jáne avtomobıl joldary bólimi 2018 jyldan beri shyrsha satyp alýǵa, bezendirýge qarjy bólmedi. Sol kezde qansha bólingenin qazir aıta almaımyz. Bul 6 jyl ótip ketken memlekettik satyp alý rásimi ári qujattar muraǵatqa jiberilgen,- dedi Aqtóbe qalasy ákiminiń baspasóz hatshysy Aıgúl Baımenova.

Aqtóbe qalasy boıynsha 25-31 jeltoqsan aralyǵynda merekelik is-sharalar uıymdastyrylady.

- Bas shyrshany jaǵý rásimi, balalarǵa arnalǵan «Ǵajaıypqa toly jańa jyl» jáne estý qabileti shekteýli balalarǵa arnalǵan «Qosh keldiń, Jańa jyly!», onyń ishinde az qamtylǵan otbasylardan shyqqan balalarǵa «Jańa jyl keldi» atty shara ótedi, - dedi Aıgúl Baımenova.

Aıta keteıik, Jańa jyl merekesine oraı Astana, Almaty jáne Shymkent qalalary arasynda qosymsha Talgo poıyzdary qatynaıdy.