Aqtóbede jańa saıabaqqa jemis aǵashy egildi
AQTÓBE. QazAqparat - Búgin Aqtóbe oblysynyń ákimi Berdibek Saparbaev, memlekettik qyzmetkerler Energııaúnemdeý ortalyǵy ǵımaraty mańyna 500 túp alma, almurt jáne órik aǵashynyń kóshetin ekti. Alda ýaqytta munda 1500 túp jóke jáne úıeńki aǵashy otyrǵyzylady, dep habarlaıdy QazAqparat tilshisi.
«Alma men órik bizdiń klımattyq jaǵdaıǵa tolyǵymen beıimdelgen, jergilikti tálimbaqtarda ósirilgen. Kóktemde qala boıynsha 200 myńǵa jýyq emen, úıeńki, jóke jáne taǵy da basqa qylqanjapyraq otyrǵyzamyz. Taǵy 200 myń kóshet qaladaǵy jasyl beldeýdi tolyqtyrady»,- dedi Aqtóbe qalalyq turǵyn úı-kommýnaldyq sharýashylyǵy bólimi basshysynyń mindetin atqarýshy Álibek Serikbaev.
Keıin oblys ákimi Berdibek Saparbaev «Nur Aqtóbe» yqshamaýdanyndaǵy turǵyndarmen sóılesti.
«Jýyq arada munda 200 myńǵa jýyq adam turatyn bolady. Buǵan barlyq ınfraqurylym eseptelgen. Mektep, balabaqsha salýdy, joldardy jóndeýdi jalǵastyramyz. Jaqynda úıge jylý, gaz, sý, jaryq berý kezinde qýat kózin únemdeıtin Elektr únemdeý ortalyǵyn paıdalanýǵa beremiz. Barlyq úılerdiń kireberisine, aýlalarǵa kamera ornatamyz. Turǵyndardyń qaýipsizdigin qamtamasyz etip, quqyqbuzýshylyqtyń jolyn kesý úshin osy ortalyqtan baqylap otyratyn bolady. Ǵımarattyń bir qanatynda «Halyqtyq keńse» ornalasady. Turǵyn úı alabyn kógaldandyrý mańyzdy. Búgin egilgen baq 3-4 jyldan keıin aýdan turǵyndarynyń jaqsy demalys ornyna aınalady»,- dedi oblys ákimi Berdibek Saparbaev. Óńir basshysymen kezdesken aýyl turǵyndary egilgen kóshetterge kútim jasaýǵa ýáde berdi.
Aqtóbe oblysy ákiminiń baspasóz qyzmetiniń habarlaýynsha, óńir basshysy jol salý, jóndeý jumystarymen tanysty. Sonymen qatar, oblys ákimi qazaqtyń uly qolbasshysy Bógenbaı batyr eskertkishi salynyp jatqan alańdy tekserdi.
«Qoladan quıylǵan jáne granıt tuǵyrdan turatyn eskertkishtiń jalpy bıiktigi 16 metrden asady. Baǵasy shamamen 150 mıllıon teńgeni quraıdy. Eskertkishtiń artqy jaǵynda Bógenbaı batyr men Ábilqaıyr hannyń basshylyǵymen Úsh júzdiń áskeriniń birikkenin beıneleıtin kórkem kórinis ornalasady. Taǵy bir ereksheligi - batyrdyń qolynda qarý emes, Qaraqumda uıymdastyrylǵan tarıhı quryltaıdaǵy qazaq áskeriniń jalaýy bolady», - dedi eskertkishti salý jónindegi Qoǵamdyq keńestiń basshysy Málik Jekeev.
