Aqtóbede jańa oqý jylynda 6 mektep qoldanysqa beriledi

AQTÓBE. KAZINFORM — «Keleshek mektepteri» jobasy aıasynda 4 mektep ashylyp, 2 jeke mektep qabyldaý júrgizedi.

Aqtóbede 2025-2026 oqý jylyna daıyndyq júrip jatyr. Oblystyq bilim basqarmasynyń basshysy Bulbul Kúzembaevanyń aıtýynsha, bıyl 441 mektep, 639 mektepke deıingi uıym, 40 kolledj jumys isteıdi. Jańa oqý jylynda 6 mektep qoldanysqa beriledi. Onyń tórteýi «Keleshek mektepteri» jobasy aıasynda salyndy, al ekeýi jeke mektep.

— Oblysta 14 520 orynǵa arnalǵan 31 bilim berý nysanynyń qurylysy júrip jatyr. Onyń ishinde 4 balabaqsha, 26 mektep jáne 1 qosymsha bilim berý mekemesi. Buǵan qosa 1000 oryndyq mektep jekemenshik ınvestor esebinen salynyp jatyr, — dedi Bulbul Kúzembaeva.

Aqtóbe oblystyq qurylys, sáýlet jáne qala qurylysy basqarmasynyń basshysy Erjan Muzdybaevtyń aıtýynsha, Aqtóbe qalasy Shılisaı turǵyn alabynda 600 oryndyq mektep, Muǵaljar aýdany Aşysaı aýylynda 60 oryndyq mektep, Qandyaǵash qalasynyń Samal yqsham aýdanynda 600 oryndyq mektep salynyp jatyr. Bul qurylysy birneshe jylǵa sozylǵan nysandar. Sonymen qatar Mártók aýylyndaǵy № 3 mektepke, Embi qalasyndaǵy № 7 mektepke jáne Qarakól aýylyndaǵy Jubanov atyndaǵy mektepke sport zaldar salynyp jatyr.

Aıta keteıik, Aqtóbede bilim berý uıymdaryn jóndeýge 5 mlrd teńdegen astam qarjy jumsalady. Kúrdeli jóndeý 19 bilim berý uıymyna júrgiziledi. Ony jóndeýge oblystyq bıýdjetten 5,4 mlrd teńge qarjy bólindi.