Aqtóbede jańa mektep paıdalanýǵa berildi
AQTÓBE. QazAqparat - Aqtóbe oblysy, Qobda aýdanynda jańa mektep paıdalanýǵa berildi. Bilim ordasy úshaýysymdy mektep máseleni sheshti, dep habarlaıdy QazAqparat tilshisi.
Aqtóbe oblysynyń ákimi Berdibek Saparbaev Qobda aýdanyna jumys saparymen bardy. Munda 320 oryndy mektep-gımnazııa paıdalanýǵa berildi.
«Táýelsizdik alǵan kúnnen bastap Memleket basshysy Nursultan Nazarbaev Qazaqstannnyń bolashaǵy úshin bilim salasyna basa nazar aýdaryp keledi. Táýelsizdik jyldary ishinde 1 myńnan astam mektep salyndy. Munyń bári óskeleń urpaqtyń halyqaralyq standarttarǵa saı bilim alyp, Qazaqstandy álemniń 30 damyǵan elder qataryna tez qosý úshin jasalyp jatyr. Memleket basshysynyń tapsyrmasyna sáıkes osy jyly Aqtóbe oblysynda 25 mekteptiń qurylysy júrgizildi. Onyń 11-i paıdalanýǵa berildi. Jyl sońyna deıin taǵy tórt mektep ashylady»,- dedi Aqtóbe oblysynyń ákimi Berdibek Saparbaev. Mektep zamanaýı úlgimen salynǵan, kompıýter kabınetteri bar. Oqýshylar úshin fızıka, hımııa kabınetteri arnaıy jasaqtaldy. Úsh qabatty ǵımaratta sport jáne májilis zaly bar. Kitaphana, medıateka, qysqy baq, demalys oryndary men taǵy basqa múmkindikter qarastyrylǵan. Mekteptiń qurylysyna 760 mıllıon teńge jumsaldy. «Qobdalyqtar óte qýanyshty. Óıtkeni, bizdiń balalarymyz endi ádemi, zamanaýı mektepte oqıtyn bolady. Men munda olardyń laıyqty bilim men rýhanı tárbıe alatynyna senimdimin. Bul oqıǵa oqýshylar men olardyń ata-analarynyń júrekterinde máńgige qalady. Bul qýnysh, eń aldymen, bizdiń elimizdiń táýelsizdiginiń, Elbasy Nursultan Nazarbaevtyń dana saıasatynyń arqasynda múmkin bolyp otyr»,- dedi aýyl turǵyny Zardahan Ábigeı.
Aıta keteıik, jańa bilim ordasy aýyldaǵy úshaýysymdy mektep problemasyn sheshýge kómektesti. «Qobda aýylynyń 314 oqýshysy úshaýysymda oqyp keldi. Endi ondaı másele bolmaıdy. Ǵımarat - zamanaýı, ádemi. Munda bilim berý sapasy jaqsarady dep senemin»,-dedi mektep dırektorynyń orynbasary Ásııa Nurbaeva.
Aqtóbe oblysy ákiminiń baspasóz qyzmetiniń habarlaýynsha, aýdanǵa jumys saparymen barǵan óńir basshysy Berdibek Saparbaev «Otan Ana» jáne «Máńgilik el» demalys jáne mádenı ortalyqtarynda boldy. «Otan ana» baǵy Keńes Odaǵynyń batyry, Qobda aýdanynyń týmasy Álııa Moldaǵulovaǵa arnalǵan. Bıyl mergen qyzǵa bıiktigi tórt metr bolatyn eskertkish ornatylmaq. Al «Máńgilik el» baǵynda Uly Otan soǵysynan oralmaǵan 3,5 myń qobdalyqtyń jáne saıası qýǵyn-súrginniń qurbany bolǵan 300 azamattyń esimi jazylǵan.
