Aqtóbede jalǵyz balasyn izdegen ana basshylardan kómek surady
AQTÓBE. QazAqparat - Aqtóbe qalasyndaǵy 41-razezd bazarynda qarbyz satyp turǵan jerinen aq tústi kólikke minip ketken Erhan Tileýmbetov bes táýlikten beri habarsyz qaldy. Anasy Raıhan Esenamanova búgin oblys ákiminen, quqyq qorǵaýshylardan, kóliginde beıne tirkeý quraly bar júrgizýshilerden kómek surady, dep habarlaıdy QazAqparat tilshisi.
Aqtóbe qalasynda turatyn Erhan Tileýmbetov kólikterge gaz qondyrǵysyn ornatyp, bıyl qarbyz satýdy qolǵa alǵan. Ol qarbyzdy Túrkistannan tasydy. Eki balanyń ákesi 3 tamyz kúni ádettegideı taýardy ákelip, ony bazarǵa shyǵarady. Buǵan deıin habarlaǵanymyzdaı, bazar ishine aq tústi kólik kelip, onymen birer mınýt sóılesip, keıin mingizip alyp ketken. Bul kórinis beınekameraǵa túsirilgenimen, kólik nómirin anyqtaý múmkin bolmaı tur.
«Bıznespen aınalysyp júrgenine bir jyl boldy. Gaz qondyryp, beıqam júrgen edi. Keıin qarbyz satýdy qolǵa aldy. Dostaryn tanımyz, úıge kelip turady. Joǵalyp ketken kúni biz túngi saǵat 23:00-de Elek polıtsııa bólimine aryz jazyp, tanystarynyń telefon nómirin túgel berdik. Ony bazar ishine kelgen kóliktiń ıesi salyp alyp ketti. Biz urlyq dep esepteımiz. Polıtsııa úsh kún kútti. Alǵashqy 15 mınýtta telefonyna qońyraý barǵan, biraq jaýap bermegen. Sodan keıin «jaýap bere almaıdy, habarlama qaldyryńyz» dedi. Al keshe sóndirýli dep tur. Eger onyń habarlasatyn múmkindigi bolsa, bir qońyraý shalyp, aıtar edi. Balam úshin alańdaımyn, kómek suraımyn»,- dedi anasy Raıhan Esenamanova.
Erhannyń týystary, dostary ony jan-jaqtan izdep jatyr. Joǵalyp ketken soń olar qala syrtyndaǵy alqaptardy qarap, aǵashtardyń arasynan izdegen. Tipti balgerlerge baryp, bazar ishinde túsirilgen beınekameralardy túgel sholyp shyqqan. Kimnen kúdiktenerin bilmeı otyrǵan otbasy jasyryn habaryn berse, baryn beretinin, kez kelgen aqparattyń qundy ekenin kózine jas alyp, aıtyp berdi.
«Bireýdiń ala jibin attaǵan emes. Temeki shekpedi, ishimdik ishpedi. Eki balasynyń qamymen jumys istedi, eńbektendi. Taıaýda ǵana balalary týraly aıtyp, olarǵa úı salyp beretinin qýana aıtyp júrdi. Mundaı kúıge qalaı túskenin bilmeı otyrmyz», - dedi naǵashy apasy Nazgúl Ernııazova.
Tileýmbetovtyń otbasy Aqtóbe oblysynyń ákimdigine, Bas prokýratýraǵa aryz túsirdi. Anasy Raıhan Esenamanova Aqtóbe oblystyq ІІD basshylyǵynyń qabyldaýynda boldy. Aqtóbe oblystyq prokýratýrasynyń baspasóz qyzmeti iz-túzsiz ketken Erhan Tileýmbetovke qatysty derek boıynsha izdeý jumystary júrip jatqanyn, oqıǵa baqylaýda ekenin málimdedi.
