Aqtóbede jalǵan jarnamamen úleskerlerdi adastyrǵan 16 kompanııa aıyppul tóleıdi

AQTÓBE. KAZINFORM — Aqtóbe oblysy boıynsha qurylys jumysyn júrgizetin 16 JShS ákimshilik jaýapqa tartyldy. Bul kompanııalar úleskerlerdi shaqyryp, áleýmettik jeliler arqyly qurylysy bitpegen turǵyn úıler týraly jarnama bergen. Talap boıynsha jergilikti atqarýshy organda tirkeýde turǵan kompanııa ǵana úleskerlerden aqsha ala alady.

Aqtóbe oblysy boıynsha qazir úleskerler máselesin sheshý ózekti problemaǵa aınalǵan. Sondyqtan óńirde «Aqtóbe qurylys kompanııasy-2023» JShS quryldy. Bul kompanııa «saqaldy qurylystar» men úleskerler máselesin sheshýmen aınalysady. 

— Búginde Aqtóbede 11 obekt boıynsha problema bar. Sol 11 nysanda 26 kópqabatty úı bar. Qazirgi kezde 3 nysandaǵy 15 úıdi ınvestorlardyń qarjysymen salyp bitirýdi josparlap otyrmyz. Bul degenimiz - 268 páter. Qalǵan obektiler boıynsha tergeý aıaqtalyp, sot ótip jatyr. Máselen Alash orda turǵyn úı keshenine qatysty sottyń birinshi satysy aıaqtaldy. Alaıda taraptar apellıatsııalyq shaǵym túsirip jatqanyn bilemiz. Úleskerler endi Turǵyn úı qurylys kooperatıvin qurady. Sot túgel aıaqtalyp, úkim kúshine engen soń barlyq aktıvter Turǵyn úı qurylys kooperatıvine ótip, «Aqtóbe qurylys kompanııasy-2023» JShS-ne beriledi. Keıin kompanııa joba daıyndap, saraptamadan ótkizedi. Sodan soń ǵana qurylyspen aınalysamyz. Qurylys ınvestorlardyń kómegimen jalǵasady nemese jergilikti bıýdjet qarjysyna júrgiziledi, — dedi «Aqtóbe qurylys kompanııasy-2023» JShS dırektory Naǵymjan Aldııarov. 

Aqtóbe oblystyq qurylys baqylaý basqarmasynyń habarlaýynsha, Aqtóbe qalasyndaǵy qurylys kompanııalary aldyn ala kelisimshartqa otyryp, áleýmettik jeli arqyly jarnama berýin údetken.

ıAǵnı áli qurylysy bitpegen, qoldanysqa bermegen úıdi jarnamalap, adamdardy jańylystyryp jatyr.

Bul QR «Turǵyn úı qurylysyna úlestik qatysý týraly» zańnamasynyń talaptaryna qaıshy áreket.

Bıyl myna kompanııalar ákimshilik jaýapqa tartyldy: 

1. «Saýlet Kýrylys Servıs-2007» JShS 
2. «SMP Grýpp» JShS
3. «NS Aktobe Jıloı Grýpp» JShS
4. «Bahıtkýrylys LTD»
5. «SK 8-Stroı» JShS
6. «Grand Complex» JShS
7. «Concrete Beton» JShS
8. «CK Sapa Qurulys» JShS
9. «KaskadServıs» qurylys kompanııasy» JShS
10. «Asar Group-2030» JShS
11. «A. S. Stroıgaz» JShS
12. «Batys City Company» JShS
13. «Talimar» JShS
14. «Pervyı kvartal» JShS
15. «Satym Grýpp» JShS
16. «Maıak LTD» JShS

Aıta keteıik, is Ákimshilik kodektiń 320 jáne 463-baptary boıynsha qozǵaldy.

Kompanııalarǵa 300 AEK (1 107 600 teńge) kóleminde aıyppul salyndy. Eger bir apta ishinde ótese, aıyppul somasynyń 50% shegeriledi.