Aqtóbede jalǵan medıtsınalyq anyqtama berýdi tabys kózine aınaldyrǵan medbıke ustaldy
AQTÓBE. KAZINFORM — Medbıke medıtsınalyq anyqtamany 5 000 — 10 000 teńgege satyp otyrǵan. Odan birneshe dárigerdiń jalǵan móri tabyldy.
Aqtóbe oblystyq PD Uıymdasqan qylmysqa qarsy kúres basqarmasy medbıkeni emhana ishinde ustady. Ol barlyǵy 40 adamǵa qujat jasap úlgergen.
— Kúdikti tanysymen aldyn ala sóz baılasyp, jalǵan medıtsınalyq qujattardy (№ 075, № 086 anyqtamalary jáne kitapsha-red.) daıyndaý jáne satýdy uıymdastyrǵan. Sóıtip mindetti zerthanalyq jáne beıindi mamandardyń medıtsınalyq tekserýlerinen ótkizbeı-aq jalǵan medıtsınalyq anyqtamalar rásimdep otyrǵan. Mundaı qujattardy rásimdegeni úshin olar 5 000 — 10 000 teńge aqshalaı syıaqy alyp kelgen. Qazirgi ýaqytta osyndaı anyqtamalardy satyp alǵan 40 azamat anyqtaldy. Jumys kabınetinde júrgizilgen tintý barysynda «Dermatolog», «Laboratorııa», «Jaramady/Goden», «Reaktsııa mıkropretsıpıtatsıı ekspress metodom» jáne «Anyqtamalar úshin» degen jazýlary bar jalǵan mórler tabylyp, tárkilendi, — dep habarlady Aqtóbe oblystyq PD baspasóz qyzmeti.
Qazirgi kezde tergeý júrip jatyr.
Aıta keteıik, Qyzylorda oblysynyń prokýratýrasy Sanıtarııalyq-epıdemıologııalyq baqylaý departamentiniń qyzmetine tekserý júrgizý barysynda laýazymdy tulǵanyń qylmystyq quqyq buzýshylyq jasaý faktisin anyqtady. Memlekettik qyzmetshi jumysta bolmaǵan sebebin jasyrý jáne jumystan qalýyn zańdastyrý maqsatynda basshylyqqa jalǵan ýaqytsha eńbekke jaramsyzdyq paraǵyn usynǵan. Tergeý barysynda qujattyń jalǵan ekeni jáne ony Syrdarııa aýdandyq aýrýhanasynyń dárigeri daıyndaǵany anyqtalǵan.