Aqtóbede jalǵan kólik nómirleri 19 200 teńgeden satylyp kelgen

AQTÓBE. QazAqparat - Aqtóbede «Jasyryn satyp alýshy» ádisimen memlekettik nómirdi 19 200 teńgege satyp alýǵa bolatyny anyqtaldy. Tekserý kezinde kólik nómirleriniń jalǵan ekeni belgili boldy, dep habarlaıdy QazAqparat tilshisi.

QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń oblystyq departamenti «Aqtóbe - adaldyq alańy» jobalyq keńsesiniń jetekshisi Muhtarıta Saǵyndyqovanyń aıtýynsha, jasyryn satyp alý kezinde alaıaqtardyń isi áshkerelendi.

«Monıtorıng kezinde 2 kúnde belgili bir somaǵa memlekettik nómirdi daıyndaýǵa bolatyny anyqtaldy. Al memlekettik kólik nómiriniń kóshirmesin óńirlerde 15 jumys kúninde jáne Nur - Sultan men Almaty qalalarynda 5 jumys kúninde alýǵa múmkindik bar. Bul úshin bar bolǵany 7070 teńge teńge tóleıdi, barlyq aıyppuldary óteledi. Degenmen, keıbir turǵyndar aıyppuldan qutylyp, ýaqyt únemdeýdi kózdep, deldaldarǵa júginedi. Sol kezde jemqorlyqqa jol beriledi. Eger jalǵan nómirmen júrgen kólik ıesi jol-kólik oqıǵasyna tap bolyp, oqıǵa ornynan ketip qalsa, olardy tabý múmkin emes. Qazir osy derekke qatysty polıtsııamen jumys júrip jatyr», - dedi «Aqtóbe - adaldyq alańy» jobalyq keńsesiniń jetekshisi Muhtarıta Saǵyndyqova.

QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń oblystyq departamenti baspasóz qyzmetiniń habarlaýynsha, kólik nómirlerin ońaı jasap, tapsyrysty oryndap otyrǵan adamdar kezdesý ornyna kelmegen. Degenmen, jasyryn satyp alýshy men tapsyrys oryndaýshy arasyndaǵy kelisim jazbasy saqtaldy.