Aqtóbede jalǵan dıplommen jumys istep kelgen dırektorlar men bapkerler jumystan shyǵaryldy
AQTÓBE. KAZINFORM – Aqtóbede Antıkor sport salasyndaǵy zań buzýshylyqtardy tekserip, 10 dırektor men bapkerdiń jalǵan dıplommen jumys istep júrgenin anyqtady. Sonymen birge syıaqyny zańsyz berý deregin tirkedi.
QR Sybaılas jemqorlyqqa qarsy is-qımyl agenttigi Aqtóbe oblysy boıynsha departamenti Jemqorlyq táýekelderi kartasyn jasady. Onda áleýmettik zertteýler, aryzdar, qylmystyq ister men quqyqtyq statıstıkaǵa taldaý jasaldy.
- Sport salasyndaǵy preventıvtik sharalar nátıjesinde «Aqtóbe» fýtbol klýbynyń burynǵy basqarma tóraǵasy Jamantaevqa 40 mln teńge somasyndaǵy zańsyz syılyqaqy berý faktisi anyqtaldy. Ol klýbta qyzmet atqarǵan ýaqytynda dırektorlar keńesiniń kelisiminsiz demeýshilik qarajat esebinen ózine 40 mln 400 myń teńge aýdarǵan. Oblys ákimdigi sottyń májbúrleý tártibimen atalǵan somany Jamantaevtan keri óndirip aldy. Sondaı-aq, bul qarajatty óńirdegi balalar fýtbolyn damytýǵa baǵyttaý usynyldy,- dedi QR Sybaılas jemqorlyqqa qarsy is-qımyl agenttigiAqtóbe oblysy boıynsha departamentiniń basshysy Esqalı Salamatov.
Onyń aıtýynsha, jemqorlyq derekteri Aqtóbe oblystyq dene shynyqtyrý jáne sport basqarmasyna qarasty mekemelerde de anyqtaldy.
- Ulttyq sport túrleri jónindegi mekteptiń bas esepshisi 3,3 mln teńge somasyndaǵy bıýdjet qarajatyn jymqyryp, Qylmystyq kodekstiń 189 babyna sáıkes is qozǵalǵan bolatyn. Qazirgi ýaqytta qarajat tolyǵymen bıýdjetke qaıtaryldy, al jaýapty tulǵa 2 jylǵa bas bostandyǵyn shekteý jazasyna kesildi. Sonymen birge 10 dırektor men bapker jalǵan dıplommen jumys istegen. Olardyń bári jumystan shyǵaryldy,- dedi Esqalı Salamatov.
Aıta keteıik, Aqtóbe oblysynda bıyl bilim salasynda 3 jemqorlyq faktisi tirkeldi. Onyń ekeýi aýdandyq bilim bóliminiń basshysy, taǵy bireýi qala mektebiniń esepshisi.
