Aqtóbede jalǵan aqparat taratqan aýyl turǵyny qamaldy
AQTÓBE. QazAqparat – Aqtóbede tótenshe jaǵdaı rejımi jarııalanǵan kúnnen beri ereje buzǵan 178 derek tirkeldi. Temir aýdanynyń turǵyny blokpost týraly jalǵan aqparat taratyp, qamaldy, dep habarlaıdy QazAqparat tilshisi.
Polıtsııa qyzmetkerleri volonterlermen birge tótenshe jaǵdaı rejımin buzǵan adamdardy anyqtaý jumystaryn jalǵastyryp jatyr. Kóbine dúken ıeleri belgilengen jumys kestesin saqtamaıdy, satýshylar maska kımeıdi.
«ÁQBtK «Tótenshe jaǵdaı rejımin buzý», «Tótenshe jaǵdaı kezinde quqyq tártibin buzýǵa ıtermeleıtin is-áreketter» baptary boıynsha aıyppul salynyp, qamaýǵa alyndy. Máselen, Temir aýdanynyń turǵyny 10 táýlikke qamaldy. Ol Whatsapp messendjer arqyly tanystaryna «Temir aýdanynda blokpost arqyly koronavırýs ınfektsııasyn juqtyrǵan adam ótken» dep aqparat taratqan. Bul aqparat jalǵan. Aqtóbe oblystyq polıtsııa departamenti azamattardy tek resmı aqparatqa senýge jáne tótenshe jaǵdaı rejımin saqtaýǵa shaqyrady», - dedi oblystyq PD baspasóz qyzmetiniń jetekshisi Erbolat Sarqulov.
Aıta keteıik, Aqtóbe qalasy 6 sáýir kúni saǵat 21:00-de karantınge jabyldy. Polıtsııa, Ulttyq gvardııa jáne Qorǵanys mınıstrliginiń áskerı qyzmetshileri kezekshilikke shyqty. Oblys ortalyǵyndaǵy kóshelerinde táýlik boıy 90-nan astam birikkken kezekshilik uıymdastyrylǵan.
