Aqtóbede jalaqysy 200 myń teńge bolatyn jumysqa maman tabylmaı tur
AQTÓBE. QazAqparat -Aqtóbe oblysynda jol salatyn kólikterdi júrgizetin mamandar tapshy. Oblystyq jumyspen qamtýdy úılestirý jáne áleýmettik baǵdarlamalar basqarmasy jumyssyzdardy qysqa merzimdi kýrstarǵa jiberedi, dep habarlaıdy QazAqparat tilshisi.
Aqtóbe oblysynda bıyl 42 myńnan astam adamdy jumyspen qamtý josparda bar. Shaǵyn nesıe alýshylarǵa 2,2 mıllıard teńge qarastyrylyp otyr. Kóbine aýyl adamdary mal alyp, ony baǵyp, ósiredi.
«Aýyl halqy mal satyp alady. Keıde nesıemen sharýashylyq jumysyn bastap, óz aýyldastaryn eńbekpen qamtamasyz etedi. Biz úshin jumyssyz adamdardy bızneske tartý jáne jańa jumys oryndaryn ashý mańyzdy. Bıyl da ótken jylǵy qarjy saqtalyp, 2,2 mıllıard teńge qarastyryldy. Ázirge, nesıe alyp, ony qaıtara almaı otyrǵan berejaq adamdar joq. Ótken jyly nesıe alǵan 100-den astam adam 352 mıllıon teńgeni berdi»,- dedi Aqtóbe oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Qaırat Otarov.
Jospar boıynsha bıyl 3 myńnan astam adam tehnıkalyq-kásiptik, qysqa merzimdi kýrstarda biliktiligin jetildirip, mamandyq alady. Al 2231 adam «Bastaý-Bıznes» jobasy aıasynda qarjylyq saýattylyqtaryn arttyrady. Qazirgi kezde Aqtóbe oblysy úshin jol salý jumystaryna qajetti mamandar qajet bolyp tur. Jalaqysy 200 myń teńge bolatyn jumysqa saı keletin kadr az.
«Bıyl Aqtóbe-Atyraý tasjolynyń qurylysy bastalady. «QazAvtoJol» mekemesi iri tasjoldardyń qurylysy kezinde arnaıy kólikterdi júrgizetin mamandardyń joq ekenin aıtty. Ótken jyly kásiporyndar aıasynda oqý ortalyǵyn ashyp, tórt kásipker osy isti qolǵa alǵan bolatyn. Jol salý kezinde de osy ádisti paıdalanyp, jumyssyz adamdardy qysqa merzimdi kýrstarǵa jiberemiz. Qazirgi kezde merdiger kompanııalar 600-ge jýyq jumys oryn ashylatynyn aıtty. Aldymen jol salynatyn aýdan turǵyndaryn oqytamyz. Aspazdardyń da sol aýyldan alynǵanyn qalaımyz. Jetpese oblys ortalyǵyndaǵy jumyssyzdar jiberiledi»,- dedi Qaırat Otarov.
