Aqtóbede jalaqy ala almaı júrgen zaýyt jumysshylary bılikten kómek surady
Al jalaqylaryn ala almaı júrgen óndiris ornynyń qyzmetkerleri búgin jınalyp, jergilikti bılikten kómek surady, dep habarlaıdy «QazAqparat» tilshisi.
«Eńbek ınspektsııasy ótken jyly «Jańatas» qıyrshyq tas zaýytyn úsh ret tekserdi. Jospardan tys tekserýden soń 1 mıllıon teńge ákimshilik aıyppul salyndy. Zaýyt basshylarynyń málimetinshe, jalaqy qaryzy tek jeltoqsan aıynda tirkelgen. Ol tapsyrys berýshiler der kezinde esep aıyryspaýynan oryn alǵan. Barlyǵy 50-den astam jumysshy jalaqy almaǵan. Onyń jalpy somasy kezekten tys tekserýden soń belgili bolady»,- deıdi oblystyq eńbek ınspektsııasy jónindegi basqarma basshysynyń orynbasary Baýyrjan Orazaev.
Eske salsaq, Aqtóbe oblysy, Shalqar aýdanyna qarasty Birshoǵyr aýyly mańynda qıyrshyq tas óndiretin «Jańatas» kompanııasy óz jumysshylaryna jalaqy tóleı almaı otyr. «Erteń bolady» degen jaýapty estýden sharshaǵan jumysshylar búgin keńse aldyna jınalyp, ákimdikten kómek surady.
«Jalaqy ala almaǵan soń, qazan aıynan bastap prokýratýraǵa, eńbek ınspektsııasyna shaǵym túsirdik. Eshkimnen jaýap kelmedi. Qazir aýyldan, qalaǵa keldik. Bir aptadan beri keńsege kelip júrmiz, jaýap joq. Bala-shaǵamyz kúnde jylaıdy, nesıemiz de tólenbeı jatyr. Tipti, qaıyr surap ketýdiń az-aq aldynda júrmiz»,- dedi jumysshy Maqsat Tájibaev.
Anyqtalǵandaı, qyzmetkerlerdiń bir bóliginde zańdy túrde resimdelgen eńbek kelisimsharty bolsa, biri jumysqa aýyzsha kelisip kirgen.
«Qaladaǵa keńsege kelip, jalaqymyzdy alamyz dep úmittendik. Biraq eshkim naqty jaýap bere almaıdy. Aýyldan keldik, qazir qaltamyzda bir tıyn aqsha qalmady. Aýylǵa qalaı qaıtarymyzdy bilmeımiz. Bárimizdiń basymyzda birneshe nesıe bar, balalarymyzǵa tamaq taýyp berý muń bolyp ketti»,- deıdi zaýyttyń taǵy bir eńbekkeri Edige Naýryzbaev.
Altynaı Saǵyndyqova
