Aqtóbede jaǵymsyz ıisti joıý úshin jumys toby quryldy
AQTÓBE. QazAqparat -Aqtóbe qalasyndaǵy jaǵymsyz ıisti joıý úshin jumys toby arnaıy beketterge baryp, káriz sýyn tazalaý oryndaryn qarady, dep habarlaıdy QazAqparat tilshisi.
Aqtóbe qalasyndaǵy jaǵymsyz ıisti bir sátte túbegeıli joıý múmkin emes. Sebebi, spırt zaýytynyń 15 jyldyq qaldyǵy, óndiristi aımaqtaǵy zaýyttardyń káriz júıesine sý aǵyzýy jáne zaýyttar tútini jaǵymsyz ıisti joıýǵa kedergi keltirip tur. Qazirgi kezde 300-den astam kompanııa tizimi berilip, tekserý kezinde 9-y jumysyn toqtatty.
«Reseıdiń Kazan ınstıtýtynan mamandardy shaqyrýǵa týra keldi. Olar da jańa ádis usyndy. Sonymen qatar, ótken jyly úsh káriz sýyn quıý stantsııasy ashyldy. Kúkirtti sýtektiń artýy boıynsha ótken jyldyń bes aıynda 54, bıyl eki derek tirkeldi»,- dedi oblystyq ekologııa departamentiniń basshysy Jaqsyǵalı Imanqulov.
Aqtóbe qalalyq ákimdigi tapsyrys berip, «Ekopolıs» kompanııasy spırt zaýytynyń qaldyǵyn joıý úshin 16 mıllıon teńgeni jaratady. Káriz sýyn quıý stantsııasyn salý jumystaryna 370 mıllıon teńgeden astam qarjy bólinip, ıgerildi. Al káriz sýyn tazartý stantsııasyn salý úshin jobalyq-smetalyq qujat daıyndaldy. Bul jobaǵa 16 mıllıard teńgeden astam qarjy qajet.
«Kópqabatty turǵyn úıler káriz sýynyń tekshe metrine 71 teńge tólep otyr. Al jeke úıler arnaıy jeke kásipkerlerdiń kómegimen káriz sýyn sorǵyzady. Bul teńsizdikti joıý úshin káriz sýyn tasymaldaıtyndarǵa arnaıy talon rejımi qosyldy. Sondyqtan úsh tekshe metrlik kólik aıyna 15 myń teńge tólese, endi ár reıske 200 teńge berýi tıis»,- dedi «Aqbulaq» AQ prezıdenti Asan Ibraev.
