Aqtóbede jaǵymsyz ıisti basyp otyrǵan merdiger atqarǵan jumys aqysyn ákimdikten óndirdi
AQTÓBE. KAZINFORM — Aqtóbe oblystyq sotynda «Tehnoservıs» JShS-niń ótinishi qaraldy. Kompanııa qalalyq turǵyn úı-kommýnaldyq sharýashylyq bóliminen 110 mln teńgeden astam qarjyny óndirip aldy.
Іs materıalyna súısensek, «Tehnoservıs» JShS-i Aqtóbe qalalyq turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimi kelisimshart aıasynda atqarǵan jumys aqysyn tólemegenin aıtyp, sotqa shaǵym túsirdi. Aqtóbe oblystyq mamandandyrylǵan aýdanaralyq ekonomıkalyq soty mamyr aıynda aryzdy qanaǵattandyrmady. Apellıatsııalyq shaǵym kezinde alǵashqy sot sheshimin joqqa shyǵaryp, jańa qaýly shyǵarýdy surady. Sot otyrysy kezinde «Tehnoservıs» JShS-i atqarǵan jumysy jóninde qujatty usynyp, jaýap berýshiniń aktke qol qoımaı júrgenin aıtty.
Aıtyp óteıik, 2024 jyly merdiger men turǵyn úı-kommýnaldyq sharýashylyq bólimi arasynda 344 848 000 teńgeniń kelisimshartyna qol qoıylady. Kelisim boıynsha merdiger Aqtóbe qalasyndaǵy jaǵymsyz ıisti basý úshin káriz júıesine tehnıkalyq qyzmet kórsetýi, oǵan bıologııalyq materıal tasymaldap, quıýy tıis. Eki akt boıynsha 99 240 221 teńge tólendi. Al qalǵan úsh akt qabyldanbady. Tapsyrys berýshi Aqtóbe oblystyq sybaılas jemqorlyqqa qarsy kúres departamentiniń bıýdjet qarjysyn tıimdi paıdalaný uıǵarymynan soń osyndaı qadamǵa barǵanyn aıtyp, túsindirdi. Tipti departamenttiń eskertýinen soń tapsyrys berýshi joldy shektep, merdiger káriz qudyqtaryna jete almaǵan.
Aqtóbe oblystyq soty Aqtóbe oblystyq mamandandyrylǵan aýdanaralyq ekonomıkalyq sotynyń sheshimin ózgertip, «Tehnoservıs» JShS-niń aryzy ishinara qanaǵattandyryldy. Aqtóbe qalalyq turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminen «Tehnoservıs» JShS paıdasyna 110 980 598 teńge óndirildi. Sot qaýlysy zańdy kúshine endi jáne 6 aıda kassatsııalyq sotqa shaǵym túsire alady.
Aıta keteıik, Aqtóbedegi káriz-sorǵy stansasynyń tozý kórsetkishi 70% jetip tur. Sol sebepti quny 53,5 mlrd teńge bolatyn Káriz-sorǵy stansasynyń qurylysy 2026-2027 jyldarǵa josparlanǵan.