Aqtóbede jaǵajaılardyń kóbi sýǵa túsý maýsymyna daıyn emes

  AQTÓBE. KAZINFORM – Aqtóbede 23 jaǵajaı ǵana sýǵa túsý maýsymyna daıyndalyp, jumysyn bastap ketti. Bul – usynystyń úshten biri ǵana.

Aqtóbe oblysynda bıyl 64 jaǵajaı jumys isteıdi dep josparlandy. Oblystyq TJD sý aıdyndaryndaǵy 71 orynnyń sý túbin tekserdi. Nátıjesinde 28 orynnyń qaýipti ekeni anyqtaldy. ıAǵnı, sý túbi tereń, balshyq, shóp ósken.

- Tıisti qutqarý quraldarynyń (qutqarý beketi, jasaqshy-qutqarýshylardyń bolmaýy) bolmaýyna balanysty 43 orynnyń tek 23-de ǵana jaǵajaı ashyldy. Qalǵan 20 orynda (Aqtóbe qalasy-13, Áıteke bı-1, Temir-3, Qobda-1, Qarǵaly-1, Shalqar-1) qutqarý quraldary men jasaqshy-qutqarýshylardyń bolmaýyna baılanysty jaǵajaı ashýǵa ruqsat berilgen joq. Aqtóbe qalasy boıynsha 13 jaǵajaıǵa ekinshi ret tekserý jumystary júrgizilip jatyr. Nátıjesi 4 maýsymǵa deıin belgili bolady. Sonymen qatar departament aýdan ákimdikterinen kelip túsken ótinimderge sáıkes jaǵajaıda kezekshilik júrgizetin 59 jasaqshy-qutqarýshyny oqý kýrsynan ótkizdi, - dep habarlady oblystyq TJD baspasóz qyzmeti.

Qazir Aqtóbe oblysynda 23 jaǵajaı jumys istep tur. Olardyń tórteýi Aqtóbe qalasynda. Qaladaǵy jaǵajaılardyń mekenjaıy:

1. «GREEN LAND» demalys orny. Aqtóbe qalasy Kirpishti 35/1

2. «Alaý» demalys orny. Aqtóbe qalasy ıAsnoe turǵyn alaby 274A.

3. «Tropıkana» demalys orny. Aqtóbe qalasy Qonaev 2B.

4. «BarBQ» jaǵajaıy. Aqtóbe qalasy ıAsnoe 52B.

Aqtóbe oblysynyń aýdandarynda:

1. Baıǵanın aýdanynyń Altaı batyr, Mııaly aýyldarynda kommýnaldyq jaǵajaı.

2. Yrǵyz aýdanynyń Yrǵyz, Amankól aýyldarynda kommýnaldyq jaǵajaı.

3. Mártók aýdany Mártók aýylynda kommýnaldyq jaǵajaı.

4. Muǵaljarda aýdany Aqkemer aýylynda «Semeınyı» jaǵajaıy.

5. Oıyl aýdanynda Kóptoǵaı jáne Oıyl aýyldarynda kommýnaldyq jaǵajaı.

6. Qobda aýdanynda Jaryq, Álııa, Qyzyljar, Qobda, Egindibulaq aýyldaryndaǵy kommýnaldyq jaǵajaı.

7. Hromtaý aýdany Kóktóbe, Qudyqsaı, Qopa aýyldary men Hromtaý qalasyndaǵy «Muǵaljar» kommýnaldyq jaǵajaıy.

Eske salsaq, Aqtóbede ózenge qoı sýarýǵa barǵan jasóspirim sýǵa batyp ketti. Oqıǵa Temir aýdany Shubarqudyq aýyly mańynda boldy. Tótenshe jaǵdaılar qyzmeti ata-analardy saq bolýǵa shaqyrdy.