Aqtóbede jaǵajaı men akvapark jumysyna tyıym salyndy
Aqtóbe oblysynda ótken táýlikte 56 adamnan koronavırýs ınfektsııasy anyqtaldy. «Sary» aımaqtaǵy óńirde búgin karantın shekteýi kúsheıtildi. Oblystyq sanıtarııalyq-epıdemıologııalyq baqylaý departamenti baspasóz qyzmetiniń habarlaýynsha, akvapark, jaǵajaılardyń qyzmetine tyıym salyndy. Sonymen birge qaladaǵy saıabaq, skverlerde balalar men eresekterge arnalǵan qozǵalys quraldaryn jalǵa berýge bolmaıdy.
«Ulttyq quramalar, klýbtyq komandalar úshin sporttyq jattyǵýlarǵa ruqsat berildi. Tek adam sany 30-dan aspaýy tıis. Sportshylar men jattyqtyrýshylar quramy COVID-19-ǵa qarsy vaktsınatsııalaýdyń tolyq kýrsyn alǵany týraly qujattamalyq rastaý usynǵan jaǵdaıda oblystyq komandalardy daıyndaý úshin oqý-jattyǵý jıyndaryn ótkizýge bolady. Tez daıyndalatyn tamaq ónimderin, kofe, balmuzdaq satatyn nysandardyń jumysyna ruqsat bar», - dep habarlady oblystyq sanıtarııalyq-epıdemıologııalyq baqylaý departamenti baspasóz qyzmeti.
Aıta keteıik, qoǵamdyq kólikke, taksıge, áýejaıǵa, temirjol vokzaldary men avtovokzaldarǵa, azyq-túlik jáne azyq-túlik emes bazarlarǵa, aıaldama pavılondaryna, úı kireberisi men jedelsaty, aýladaǵy balalar alańdaryna jáne basqa da qoǵamdyq oryndarǵa sanıtarııalyq jáne dezınfektsııalyq óńdeý jumystaryn júrgizýdi kúsheıtý tapsyryldy. Al saıabaqtarda 3 adamnan ǵana birge tynyǵýǵa bolady. Top bolyp jınalýǵa tyıym salynǵan. Jerleý kezinde adamdar 2 metr araqashyqtyqtyqty saqtap turady. Onda da adam sany 20-dan aspaýy kerek.
