Aqtóbede zeınetkerler de qoǵamdyq kólikte tegin júredi

AQTÓBE. KAZINFORM – Aqtóbe qalasynda zeınetkerler de endi qoǵamdyq kólikte tegin júredi. Qazirgi kezde qujatty bekitý úshin usynys berildi.

Aqtóbe oblysy boıynsha soǵys ardagerleri, І top múgedekteri avtobýsta tegin júrý quqyǵyna ıe edi. Endi ózge de sanattaǵy múgedekter men zeınetkerler de aqysyz qatynaı alady. Bul týraly Aqtóbe oblysynyń ákimi Ashat Shaharov oblystyq máslıhat sessııasynda habarlady. 

- Óńirde barlyq joba tikeleı halyqqa jetetindeı bolýy kerek. Qarjy bólinedi. Halyq ony seze me, sezbeı me? Máselen, konferentsııa, taǵy ózgesin ótkizemiz, qyrýar qarjy bólemiz. Al onyń tıimdi tusy halyqqa jetti me? Halyq aýlany, kósheni durystap, shamnyń janyp turǵanyn qalaıdy. Ol úshin baryp, kórip, bilýimiz kerek. Depýtat ta , áriptesterimiz de. Qazir oǵamdyq kólik tasymaly jaqsy damyp keledi. Jaqynda 30 avtobýs ákelindi. Taǵy 4 mekeme 65 avtobýs satyp alýǵa suranys berdi. Sóıtip tasymaldaý salasynda 90-95% zamanaýı jaǵdaı jasaıtyn múmkindigimiz bar. Buǵan deıin belgili bir sanattaǵy adamdar ǵana tegin júrýge múmkindik aldy. Endi múmkindigi shekteýli azamattar men zeınetkerlerdiń qoǵamdyq kólikte tegin júrýine jaǵdaı jasalady. Muny bıýdjet kóteredi. Jaqynda qala ákimdigi tııanaqtap, tıisti qujattaryn retteıdi,- dedi Aqtóbe oblysynyń ákimi Ashat Shaharov.