Aqtóbede zaýyt jumysshylary jarty jyldan beri jalaqysyn ala almaı júr

AQTÓBE. QazAqparat - Aqtóbede qıyrshyq tas shyǵaratyn zaýyt jumysshylaryna 2018 jyldyń maýsym aıynan beri jalaqy bermegen. Qazir ákimdik arnaıy komıssııa qurdy, dep habarlaıdy QazAqparat tilshisi.

Aqtóbe oblysy, Shalqar aýdany, Bershúgir aýylynda qıyrshyq tas óndiretin «Jańatas Aqtóbe» JShS 100-den astam jumysshynyń aılyǵyn keshiktirip jatyr. Búgin jumysshylar kompanııanyń keńsesine baryp, óz eńbekaqysyn talap etti.

«2015 jyldan beri «Jańatas Aqtóbe» JShS-de jumys isteımin. 2018 jyldyń maýsym aıynan beri aılyq alǵanymyz joq. Aqtóbe oblysy, Shalqar aýdanynyń ákimdigine, Aqtóbe oblystyq eńbek ınspektsııasyna aryz jazyldy. Sotqa aryz jazyp, «jalaqy ýaqytyly berilsin» degen sheshim shyǵardy. Sol kezde «Jańatas Aqtóbe» JShS aryz jazyp, birinshi sot sheshimi buzyldy. Ózime 2,5 mıllıon teńge bereshek. Basshylar tek «aqsha» joq dep aıtady. Aı saıyn zeınetaqy tólemi jalaqymyzdan ustalady, biraq 2015 jyldan beri túspegen», - deıdi zaýyt jumysshysy Tóleý Jandýllın.

Al júrgizýshi bolyp jumys istegen Murat Myńaıdarov 465 myń teńge jalaqysyn ala almaı júr. Oǵan da zeınetaqy qoryna eshqandaı tólem aýdarylmaǵan.

«Men 467 myń teńgeden astam jalaqymdy ala almaı júrmin. Jumysshylardyń kóbi aýylda, aqsha bolmaǵan soń kezdesýge kele almady. Qalada turatyn jumysshylar kún saıyn keńsege barady», - deıdi esepshiniń orynbasary Nurken Qarabalın.

Aqtóbe oblystyq eńbek ınspektsııasy basshysynyń orynbasary Baýyrjan Ýrazaevtyń aıtýynsha, kompanııaǵa tekserý júrgizilip, eńbekaqyny ýaqytyly tóleýge uıǵarym berilgen.

«2017 jyldan bastap jospardan tys tekserý júrip jatyr. Inspektsııa aıyppul saldy, uıǵarym berildi. Sot jalaqyny tóleýge mindettep, keıin sheshimdi qaıtaryp jatyr eken. Sebebin anyqtaıtyn bolamyz», - dedi Baýyrjan Ýrazaev.

Jumysshylar oblys ákiminiń orynbasary Qaırat Bekenovtyń qabyldaýynda boldy. Arnaıy komıssııa tekserý júrgizip, ınvestormen aradaǵy kelisimshartty buzý jolynda jumys atqarylady.

«Eńbekaqy qaryzy baqylaýda tur. Kásipkerge qaryz tólenbese, ken ornyn jalǵa alý kelisimsharty buzylatyny eskertildi. Qazir bir kelisimshart banktiń kepildiginde tur eken. Biz kepilde tursa da, kelisimshartty buza alamyz. Kelisimsharttyń buzylatyny jóninde resmı habarlama beriledi», - dedi Qaırat Bekenov.

Aıta keteıik, «Jańatas Aqtóbe» kompanııasy jumysshylaryna 64 mıllıon teńge qaryz.