Aqtóbede zańsyz balyq satý isine qatysty polıtsııa qyzmetkeri sottaldy
AQTÓBE. QazAqparat - Aqtóbede oblystyq polıtsııa qyzmetkeri Marat Baevqa búgin úkim shyqty. Oǵan Qylmystyq kodekstiń «Bılikti nemese laýazymdyq ókilettikterdi asyra paıdalaný» baby boıynsha aıyp taǵylǵan bolatyn, dep habarlaıdy QazAqparat tilshisi.
Aqtóbe qalalyq sotynda polıtsııa qyzmetkeri Marat Baevqa úkim shyqty. Ol 2018 jyldyń aqpan aıynan beri qamaýda otyr.
«Marat Baev Qylmystyq kodekstiń «Bılikti nemese laýazymdyq ókilettikterdi asyra paıdalaný» baby boıynsha aıypty dep tanylyp, 6 jylǵa bas bostandyǵynan aıyrý jazasy taǵaıyndalsyn. Ómir boıy memlekettik qyzmette jumys isteı quqyǵynan aıyrylsyn. Jazasyn qylmystyq atqarý júıesiniń qaýipsizdigi tómen mekemesinde ótesin. Sot úkimi zańdy kúshine engenge deıin Marat Baevtyń kúzetpen ustaý túrindegi bultartpaý sharasy ózgerissiz qalsyn», - dedi sýdıa Erbol Ábdihalyqov.
Buǵan deıin habarlaǵanymyzdaı, Aqtóbede qara ýyldyryq pen bekire satýshylardy bopsalaǵan bir top polıtsııa qyzmetkeri ustaldy. Uıymdasqan qylmysqa qarsy kúres basqarmasy bastyǵynyń orynbasary Abaı Davletov, basqarmanyń bólim bastyǵy Samat Nuǵmetjanov, jedel ýákil Nurlan Aqalasov, aǵa jedel ýákil Dáýren Kalının Qylmystyq kodekstiń «Bılikti nemese laýazymdyq ókilettilikterdi asyra paıdalaný» baby boıynsha sottaldy. Sol kezde Marat Baev qashyp ketip, izdeý jarııalandy.
Aıta keteıik, úkimdi tyńdaǵan sottalýshy Marat Baev apellıatsııalyq shaǵym túsiretinin jetkizdi.
