Aqtóbede zańsyz balyq satqan polıtseıler sottalyp jatyr

Aqtóbe oblystyq Іshki ister departamenti, Uıymdasqan qylmysqa qarsy kúres basqarmasynyń birneshe qyzmetkeri búgin sot aldyna keldi. Olar: Uıymdasqan qylmystyq qarsy kúres basqarmasy bastyǵynyń orynbasary Abaı Davletov, basqarmanyń bólim bastyǵy Samat Nuǵmetjanov, jedel ýákil Nurlan Aqalasov, aǵa jedel ýákil Dáýren Kalının. Burynǵy polıtsııa qyzmetkerlerine Qylmystyq kodekstiń «Bılikti nemese laýazymdyq ókilettilikterdi asyra paıdalaný» baby boıynsha aıyp taǵyldy.

Іs materıaldaryna súıensek, aıyptalýshylar Abaı Davletov, Samat Nuǵmetjanov, Nurlan Aqalasov, Dáýren Kalının laýazymdyq qyzmetterin asyra paıdalanyp, zań buzǵan. 2016 jyldyń qyrkúıek aıynda Nurlan Balqojaev bazarda balyq satatyn Aıgúl Nurǵalıevamen tanysady. Al 2017 jyldyń naýryz aıynda satýshy Nurǵalıeva joıylyp ketý qaýpi bar, tyıym salynǵan balyqty satatyn adamdardyń bar ekenin Balqojaevqa habarlady. Sol kezde Ulttyq qaýipsizdik komıteti departamentiniń burynǵy qyzmetkeri Balqojaev ýyldyryq pen bekire satatyndar týraly aqparatty ІІD Uıymdasqan qylmysqa qarsy kúres basqarmasy bastyǵynyń orynbasary Abaı Davletovke beredi. Uzaq jyl boıy ulttyq qaýipsizdik qyzmetkeri bolyp jumys istegen Balqojaev Uıymdasqan qylmysqa qarsy kúres basqarmasy bastyǵynyń orynbasary Abaı Davletovpen jumys barysynda tanys bolatyn. Bir-birin tanıtyn eki organ qyzmetkeri páterde kezdesedi. Olardyń janynda burynǵy polıtsııa qyzmetkeri Sahıpov ta bolǵan. Sol kúni Ataýova, Balǵynbaeva, Bısenǵalıevten ýyldyryq pen bekere satyp alýǵa bolatyny habarlandy. Páter ishindegi kelisimnen soń Nurǵalıeva Nurlan Balqojaev jáne Sahıpovpen birlese bekire men ýyldyryq satyp alýdy uıymdastyrady. Keıin qaladaǵy oıyn-saýyq kesheniniń aldynda zańsyz balyq satqan Nesibeli Ataýova ustalady. Іs tergeýge jiberildi.

Keıin bekire balyǵyn zańsyz satyp júrgen Bısenǵalıevti ustaý jedel sharasy ótken. Sot otyrsy kezinde memlekettik aıyptaýshy, 184 keli bekire balyǵyn satýǵa kelisken Asylbek Bısenǵalıevpen kezdesý ótkizilip, ustaý operatsııasy kezinde kúdiktiniń qashqany týraly aıtty. Keıin polıtsııa qyzmetkerleri balyq satýshyny ustap alyp, ony bopsalady. Aıyptaý qorytyndysyna súıensek, polıtsııa qyzmetkerleri qylmystyq jaýapkershilikten bosatý úshin 500 myń teńge suraǵan. Bısenǵalıev talap etken aqshany polıtsııa qyzmetkerlerine berdi. Keıin salmaǵy 79 keli bolatyn 23 dana bekireni Balqojaevqa berip, ol jábirlenýshi Nurǵalıevaǵa tapsyrdy. Sóıtip satýdy uıǵardy. Aıapov arqyly 20 dana bekireni satyldy. Aqshasyn Sahıpov Davletovke berdi. Keıin osy jolmen Balǵynbaevadan 2 keli  ýyldyryq tárkilendi. Polıtsııa qyzmetkerleri Balǵynbaevadan 500 myń teńge surady. Ýyldyryq satýshy 300 myń teńge tólep, jaýapkershilikten bosatyldy. 2017 jyldyń sáýir aıynda Eset batyr kóshesinde ýyldyryq satqannan túsken 70 myń teńgeni alyp jatqan jerinen Abaı Davletov ustaldy. Búgingi sot otyrysy kezinde Aqtóbe qalasynyń prokýrory aıyptaý qorytyndysyn oqyp, jábirlenýshi Aıgúl Nurǵalıevadan jaýap alyndy. Kelesi sot otyrsy bir aptadan soń ótedi.

Aıta keteıik, aıyptalýshylar ózderine taǵylǵan aıyppen túgel kelisken joq. Osy qylmystyq is boıynsha Marat Baev izdeýde júr.