Aqtóbede zamanaýı jeńil atletıka maneji salynady
AQTÓBE. QazAqparat - Aqtóbede memlekettik-jekeshelik seriktestik aıasynda jeńil atletıka maneji salynady. Sonymen qatar, IT tehnologııa ortalyǵyn bıznestiń áleýmettik jaýapkershiligi aıasynda munaı kompanııasy salyp beredi, dep habarlaıdy QazAqparat tilshisi.
Aqtóbede memlekettik-jekeshelik seriktestik aıasynda 73 jobanyń kelisimi jasaldy. Sport, densaýlyq saqtaý, bilim men mádenıet salasyndaǵy nysandardyń basym bóligi Aqtóbe qalasynda boı kóterip jatyr. Sonymen qatar, shalǵaı aýdan, aýyldarda medıtsına nysandary salyndy.
«Memlekettik-jekeshelik seriktestik aıasynda Chehııa eliniń ınvestorlary 2 500 kórermenge arnalǵan Muz saraıyn qoldanysqa beredi. Joba quny - 3,7 mlrd teńge. Qarjynyń 70 paıyzyn «N+N Technica» kompanııasy bóldi. Jospar boıynsha nysan iske qosylǵan kezde mánerlep syrǵanaýdan Qazaqstan chempıonaty ótedi. Sonymen qatar, Aqtóbe qalasy, Batys-2 yqsham aýdanynda Tennıs ortalyǵynyń qurylysy júrip jatyr. Jańa sport kesheni shilde aıynda paıdalanýǵa beriledi. Munda tórt jabyq, tórt ashyq kort bolady. Keshende 500-den asa adam jattyǵa alady. Al jeńil atletıka manejiniń qurylysy endi bastalady»,- dedi Aqtóbe oblystyq dene shynyqtyrý jáne sport basqarmasynyń baspasóz qyzmetkeri Sara Amangeldi.
Aqtóbede ekonomıkany sandyq júıege kóshirý iske asyrylyp jatyr. Elbasy Nursultan Nazarbaevtyń tapsyrmasyna oraı «Smart Aktobe» jańa aqparattyq tehnologııalar ortalyǵy qurylady. Óńir basshysy Berdibek Saparbaev munaı kompanııasyna IT parkin salý jobasyn usyndy. Oblys ákiminiń baspasóz qyzmetiniń habarlaýynsha, IT parktiń jumysy start-ap jobalar jáne damyp kele jatqan aqparattyq kompanııalar úshin qolaıly jaǵdaı jasaýǵa baǵyttalady.
