Aqtóbede zamanaýı tarıhı-ólketaný mýzeıi salynyp jatyr
Aqtóbe oblystyq tarıhı-ólketaný mýzeıi eki jyl buryn jabylǵan bolatyn. Tótenshe jaǵdaılar qyzmeti ǵımaratty apatty dep tanyp, órt qaýipsizdigi saqtalmaǵan nysannyń jumysyna shekteý qoıdy. Sodan beri óńirdiń geografııasy, tarıhy, tabıǵaty, qazba baılyqtary men jalpy qurylymy týraly aqparattyń bári jabyq esiktiń ar jaǵynda qalyp, qala turǵyndary men qonaqtar úshin bar málimet shaǵyn kórmelerde ǵana tanystyrylyp keledi. Qýantarlyǵy, birneshe aıdan soń 103 myń jádigeri bar mýzeı jańa ǵımaratqa qonys aýdarady. Bul qurylysqa memlekettik-jekemenshik seriktestik aıasynda 635 mıllıon teńgeden astam qarjy bólindi.
«Negizgi qurylys jumystary aıaqtaldy. Qazirgi kezde ishki bólý jumystary men árleý júrip jatyr. Qurylys jumystary kezinde bastapqy jobaǵa ózgertýler men tolyqtyrýlar engizilip, eń úlken zaldyń aýmaǵyn keńeıtý qarastyryldy. Qurylysty birneshe áleýmettik nysandy salǵan «Elıtstroıservıs» seriktestigi júrgizip jatyr. Olar jergilikti qurylys materıaldaryn keń paıdalandy. Tek ǵımarattyń qasbetine arnalǵan mármár tastar ımporttaldy. Qurylysqa jergilikti bıýdjet pen kásipker teń qarjy bóldi. Jyl sońyna deıin mýzeı paıdalanýǵa beriledi»,- dedi Aqtóbe oblystyq sáýlet, qala qurylysy jáne qurylys basqarmasy basshysynyń orynbasary Nurlan Imanalın.
«Týǵan jerge taǵzym» aktsııasy aıasynda qurylys jumystaryna metsenat, «Altyn Qyran» kompanııalar tobynyń quryltaıshysy jáne bas dırektory Islambek Saljanov kómek kórsetti. Mýzeı aýmaǵy 2 gektardy alyp jatyr. Aldaǵy ýaqytta murajaı aldyndaǵy eki ashyq alańda konkýrstar ótkizýge bolady. Sonymen qatar, 60 kólikke arnalǵan avtoturaq, sýburqaq salynady.
Aqtóbe qalasynda salynyp jatqan úshqabatty zamanaýı mýzeıdiń analogy elimizdiń batys aýmaǵynda joq. Mýzeı ǵımaratynda tehnıkalyq, qyzmettik-ákimshilik, kórsetilim zaldary bar.
«Aqtóbe oblystyq tarıhı-ólketaný mýzeıi 1929 jyly ashyldy. Eski ǵımarat 100 myńnan astam eksponaty bar mýzeıge óte tar edi. Ólkeniń tarıhy men tabıǵatyn, mádenıetin, ózindik erekshelikterin kórsetý múmkin bolmady. Al jańa ǵımaratta 10 ekspozıtsııalyq zal bar. Sonymen qatar, eń joǵary bóligine konferentszal salynady. Qazir ekspozıtsııalyq zaldardy jabdyqtaý jumystary júrip jatyr. Sonymen qatar, mýzeı qoryn tolyqtyrý úshin tarıhı jádigerlerdi satyp alamyz»,- dedi Aqtóbe oblystyq mádenıet basqarmasynyń basshysy Marjan Qorǵanbaeva.
Qor saqtaý ornymen qatar, eksponattardy qalpyna keltirý jumystaryn júrgizetin arnaıy bólme qarastyrylǵan. Sonymen qatar, jańa mýzeıde ulttyq qolóner buıymdaryn, kádesyılar satatyn dúńgirshikter jumys isteıdi.
Aıta keteıik, Aqtóbede «Memlekettik-jekemenshik seriktestiktiń aımaqtyq ortalyǵy» JShS quryldy. Qazirgi ýaqytta densaýlyq saqtaý, bilim, sport, mádenıet salasynda 27 joba iske asyrylýda.
