Aqtóbede zalalsyzdandyrý jumysyna arnalǵan suıyqtyq óndirile bastady
AQTÓBE. QazAqparat - Aqtóbede zalalsyzdandyrý jumystaryna arnalǵan suıyqtyq, antıseptık shyǵarylady, dep habarlaıdy QazAqparat tilshisi oblys ákiminiń baspasóz qyzmetine silteme jasap.
Aqtóbe oblysynyń ákimi Ońdasyn Orazalın Covid-19 juqpaly indetine baılanysty jumysyn bastaǵan call-ortalyqty qarap shyqty. Munda on maman úzdiksiz qyzmet kórsetý tártibinde jumys isteıdi. Oblystyq aqparattandyrý jáne syrtqy baılanystar basqarmasynyń basshysy Sergeı Bekker operatorlardyń jumysyn kórsetti. Munda 1 kúnde 100-ge jýyq suraq túsken.
Sonymen qatar, oblys ákimi turmystyq hımııa ónimderin shyǵarýmen aınalysatyn tseh jumysymen tanysty. Buǵan deıin turmystyq hımııa ónimin shyǵarǵan kompanııa endi dezınfektsııa ónimderiniń 4 túrin, ıaǵnı, antıseptık, hloroseptık ázirleıdi. Ónimder Ózbekstan, RF eksporttalady.
Oblys ákimi Ońdasyn Orazalın seriktestik basshysy Arystanbek Jumabaevqa eń aldymen jergilikti naryqty qamtamasyz etýdi tapsyrdy.
Aqtóbede medıtsınalyq betperde de shyǵarylady. Dári-dármek, 70%-90% spırt te bar. Munda ár aýysymda 5 myń dana betperde daıyndalyp jatyr. Oblys ákimi Ońdasyn Orazalın orynbasary Qaırat Bekenovke, kásipkerlik basqarmasynyń basshysy Qaırat Raıymqulovqa jergilikti kásipkerlerge barynsha qoldaý kórsetýdi jáne aımaqty qajetti medıtsınalyq jabdyqtarmen qamtamasyz etýdi tapsyrdy.
«Mańyzdysy - medıtsınalyq jabdyqtardyń sanyn arttyrý, ózimizden artylǵan jaǵdaıda ǵana basqa elderge tasymaldaý. Sonymen qatar, qaladaǵy halyq kóp júretin oryndarda zalalsyzdandyrý jumystaryn úzdiksiz júrgizip, qolda bar múmkindikti tolyq paıdalaný qajet» ,- dedi Ońdasyn Orazalın.
