Aqtóbede zaǵıptar qoǵamy Álııa Moldaǵulovanyń 100 jyldyǵyna arnalǵan spektakl qoıdy
AQTÓBE. KAZINFORM — Aqtóbe oblysynda Jeńistiń 80 jáne Keńes Odaǵynyń Batyry Álııa Moldaǵulovanyń 100 jyldyǵyna arnalǵan «Snaıper» qoıylymy sahnalandy, dep habarlaıdy oblys ákimdiginiń baspasóz qyzmeti.
«Snaıper» qoıylymy — qalalyq qazaq zaǵıptar qoǵamy Mádenıet úıiniń alǵashqy birlesken jumysy.
— Biz osy qoıylym arqyly batyr qyzdyń erligin, qaısarlyǵyn jáne adamgershilik qasıetterin jastarǵa ónege etip, onyń jarqyn beınesin eske alýdy jón kórdik.
Qoıylymnyń formaty erekshe boldy. Kóriniste soǵys sahnalary mıýzıkl nusqada qoıyldy. Bul tájirıbe — bizdiń alǵashqy bastamamyz. Eń basty maqsat — múmkindigi shekteýli jandardyń boıyndaǵy ónerdi shyńdaý, qoldaý kórsetý. Qoıylymǵa 6 ónerpaz qatysty. Olar ózderiniń alǵashqy debıýtterin sátti oryndady. Aldaǵy ýaqytta taǵy da osyndaı is-sharalardy uıymdastyrý josparda bar, — dedi ádisker Erbolat Esenbekuly.
Qoıylym ónersúıer qaýymǵa erekshe áser qaldyrdy. Álııa rólin somdaǵan Jarqyn Baqbergen kórermen júregin jaýlap, olardyń ystyq yqylasyna bólendi. Keıbiri kózine jas alyp, ónerpazdarǵa alǵys bildirdi.
Osyǵan deıin Topaı asyq jınaǵan aqtóbelik kollektsıoner Gınness rekordtar kitabyna engisi keletini belgili boldy.