Aqtóbede iz-túzsiz joǵalyp ketken áıeldiń kisi qolynan qaza bolǵany anyqtaldy
AQTÓBE. KAZINFORM – Aqtóbede kóligin satýǵa shyǵyp, úıine oralmaǵan áıeldiń adam qolynan qaza tapqany belgili boldy. Polıtsııa onyń denesin qala mańynan tapty.
Aqtóbe oblystyq polıtsııa departamenti 9 maýsym kúni kólik satýǵa shyǵyp, iz-túzsiz ketken 55 jastaǵy áıeldiń ólimine qatysty tergeý júrgizip jatyr.
- Habarlama túsken boıda jeke quram shuǵyl kóterilip, jedel-izdestirý sharalary uıymdastyryldy. Kúdikti kóp uzamaı ustaldy. Onyń turǵylyqty jeriniń garajynan urlanǵan avtokólik tárkilendi. Kúdikti ýaqytsha ustaý ızolıatoryna qamaldy. Qylmystyq kodekstiń 99, 192-baptary (kisi óltirýmen ushtasqan qaraqshylyq shabýyl) boıynsha sotqa deıingi tergep-tekserý bastaldy,- dep habarlady Aqtóbe oblysy Polıtsııa departamenti baspasóz qyzmetiniń jetekshisi Erbolat Sarqulov. Al jábirlenýshiniń denesi qala mańynan tabylǵan. Onyń denesinde zorlyq-zombylyq belgileri bolǵan. Qazirgi kezde saraptamalar taǵaıyndalyp, tergeý júrip jatyr.
Aıta keteıik, 1969 jyly týǵan Klara Sultanbaevany izdeý jumysy 9 maýsym kúni bastaldy. Oǵan polıtsııamen qatar eriktiler de jumyldy. Ol shamamen saǵat 9:00-de shyǵyp ketip, habarsyz qalǵan.
