Aqtóbede ıývenaldy polıtsııa tártibi nashar balalardy lagerge apardy
AQTÓBE. QazAqparat - Aqtóbede ıývenaldy polıtsııa qyzmeti balalardy lagerge apardy. «Batyr» shatyrly lagerine tártibi nashar, polıtsııa qyzmetkerleriniń baqylaýyna alynǵan balalar bardy, dep habarlaıdy QazAqparat tilshisi.
Aqtóbe oblystyq ІІD, Jergilikti polıtsııa qyzmetiniń ıývenaldy polıtsııasy shatyrly lager uıymdastyrdy. Oblystyq bilim basqarmasy polıtsııa qyzmetkerleriniń bastamasyn qoldap, balalarǵa jazdy demalys syılady.
«Jazǵy demalysta tynyǵyp, tabıǵat aıasyna shyqqan unady. «Batyr» lagerinde biz adamdarmen aralasýdy úırenip, túrli merekelik sharaǵa qatysyp jatyrmyz», - dedi mektep oqýshysy Nurzııa Sháripova.
Balalardyń bos ýaqytyn tıimdi ótkizý maqsatynda qaladaǵy mektepterde bilim alatyn 80 bala memlekettik lagerde tynyǵatyn bolady. 10-14 jas aralyǵyndaǵy oqýshylar 5 kún boıy demalyp, dalada qurylǵan shatyrlarda uıyqtaıdy. Lagerdegi tártipti polıtsııa qyzmetkerleri arnaıy baqylaıdy. Cebebi, lagerge arnaıy shaqyrylǵandar polıtsııa tirkeýine alynǵan, tártibi nashar balalar. Qylmystyń aldyn-alýǵa, jasóspirimderdi tárbıeleýge baǵyttalǵan jumys kezinde sporttyq-patrıottyq jarystar uıymdastyryldy. «Bul sharanyń maqsaty -jazǵy kanıkýl kezinde jasóspirimderdiń bos ýaqytyn tıimdi uıymdastyrý jáne olardy salaýatty ómir saltyn ustanýǵa tárbıeleý. Shatyrly lagerler óz tıimdiligin kórsetedi. Balalardy aýyzbirshilikke, tatýlyqqa tárbıeleýde úlken mańyzy bar», - deıdi Aqtóbe oblystyq ıývenaldy polıtsııasynyń bastyǵy Aqtolqyn Óteshova.
