Aqtóbede vokzal kezekshisi ekinshi qabattan sekirip ketip, buǵan basshylyqty kinálaýda

Ol eki ulyna hat jazyp, kináli adamdardyń aty-jónderin qaldyrǵan. Onyń sózinshe, ol bul áreketke vokzal ákimshiligimen bolǵan urys-keristen keıin barǵan. Al ǵımarat ákimshiligi óz tarapynan eshqandaı qysymnyń jasalmaǵanyn aıtýda, dep habarlaıdy QazAqparat tilshisi.

Aqtóbe vokzalynda kezekshi bolyp jumys istep júrgen 43 jastaǵy Janat Jasambaeva 27 sáýir kúni vokzaldyń ekinshi qabatynan sekirip, óz-ózine qol jumsaǵan. Oblystyq jádel-járdem aýrýhanasyna jetkizilgen naýqas bas jaraqatyn alǵan, mıy shaıqalǵan.

«Túsken kezde jaǵdaıy ortasha aýyr boldy. Qazir óz-ózine kelip jatyr. Jaǵdaıy birqalypty. Tekserýlerden ótti. Emin jalǵastyrýda. Osy aptanyń sońyna deıin emin jalǵastyryp, ýchaskelik nevropatologtyń baqylaýyna jiberiledi. Ómirine eshqandaı qaýip tónip turǵan joq. Múgedek bolyp qalmaıdy»,- dedi oblystyq jedel járdem aýrýhanasynyń dáriger neırohırýrgi Maqsut Erkebaev.

Janat Jasambaeva Aqtóbege Qyzylorda oblysynan qonys aýdarǵan. Ol kúni búginge deıin vokzal kezekshisi bolyp jumys istedi.

«Vokzal servıs» JShS-ǵa jumysqa turǵanymda qylmystyq ortaǵa tap bolǵanymdy bildim. Bul jerde bári aqshaǵa baılaýly eken. Men jolaýshylarǵa aryz-shaǵym kitabyn berip, mindetimdi buljytpaı oryndadym. Al Aqtóbe vokzalynda aryz-shaǵym kitaby berilmeıdi eken. Sol úshin meni vokzal basshysy Múslıma Qosanova Aqtóbe stansasyndaǵy jelilik ishki ister bólimine tapsyrdy. Eshteńe dáleldenbeı, meni bosatty. Qańtar aıynan beri osyndaı jaǵdaı. Jumystan shyǵyp kete almaımyn. Eki balam stýdent. Ózim qalada páter jaldap turamyn»,- dedi Janat Jasanbaeva.

Aýrýhanada em alyp jatqan vokzal kómekshisiniń aıtýynsha, basshylar «jumystan shyq, ornyńdy bosat» dep talap qoıǵan. Birneshe ret bas tartqan J.Jasambaeva qysymǵa shydaı almaı, jumystan shyǵý týraly aryz jazyp, qol qoıdy. Keıin vokzaldyń ekinshi qabatynan sekirip ketken. Ol aldyn ala hat jazyp, mán-jaıdy túsindirgen. 

«Jolaýshylar úshin bılet alý qıyn. Bılet bolsa da kassada «bılet joq» deıdi. Sebebi, bıletti óz adamdary alyp, qaıta satady. Jolaýshylarǵa «baryńdar, kassada bılet bar, alyńdar» deımin. Sol úshin de jazalandym. Poıyz arqyly aqsha tasymaldanady. Men ol jerge barmaımyn, aqshany kútip almaımyn»,- dedi J.Jasambaeva.

Qazir osy oqıǵa boıynsha Aqtóbe stansasyndaǵy jelilik ishki ister basqarmasy tekserýdi bastady. Al vokzal basshylyǵy jumysshyny qýdalamaǵandaryn aıtady.

«Janat Jasambaevany eshkim qýdalap, oǵan urysqan emes. Ol sol kúni jumysta boldy. Qazir oqıǵa boıynsha tergeý bastaldy. Biz jaýap berdik»,- dedi vokzal basshysy Múlıma Qosanova.