Aqtóbede vırýsqa qarsy dári shyǵaryla bastady
AQTÓBE. QazAqparat – Aqtóbedegi farmatsevtıkalyq kompanııa vırýsqa qarsy dári shyǵara bastady, dep habarlaıdy QazAqparat tilshisi oblys ákiminiń baspasóz qyzmetine silteme jasap.
Aqtóbedegi kásiporyn 6 mıllıon túıirshik jáne kapsýla túrindegi dári shyǵaryp, jylyna 75 tonnaǵa deıin shárbat óndire alady. Memleket basshysynyń dári-dármekpen qamtamasyz etý tapsyrmasyn oryndaý maqsatynda vırýsqa qarsy «Grıppovır» preparatyn óndirý úshin shıkizat satyp alýǵa kompanııaǵa 75 mıllıon teńge qarjy bólindi. Preparattyń óndirisi barlyq halyqaralyq standartqa sáıkes keledi. Baǵasy naryqtaǵy usynylǵan analogtardan 42 % arzan bolady. Munda aptasyna 5 myń, al asa qajet bolsa 15 myń dári shyǵarý josparda bar.
«Jergilikti taýar óndirýshini qoldap, qarjy bólindi. Nátıjesinde «Grıppovır» dárisi 1500 teńgege shyǵarylýda. Osylaı óndiris kólemin ósirýge bolady. Dári túrin kóbeıtip, baǵasyn tómendetýge múmkindik bar», - dedi «Atameken» óńirlik kásipkerler palatasynyń dırektory Anar Darjanova.
