Aqtóbede vırýs juqtyrǵan naýqas karantınde, eshkimge qaýip tónip turǵan joq - ákimdik
AQTÓBE. QazAqparat - Aqtóbede eshkimge qaýip tónip turǵan joq, dep habarlaıdy QazAqparat oblys ákiminiń baspasóz hatshysy Ǵanı Jápishevke silteme jasap.
Onyń aıtýynsha, aqparat taratqanda tek resmı málimetterge júgingen jón.
«Iá, indet juqtyrǵan bir adam anyqtalǵany ras. Biraq óńirdegi barlyq jaǵdaı tolyq baqylaýda. Naýqas karantınde. Turǵyndarǵa tónip turǵan qaýip joq. Qalǵan málimetterdi erteń tańerteńgi brıfıngte habarlaımyz», - dep jazdy Ǵanı Ótepbaıuly Facebook paraqshasynda.
Aıta keteıik, erteńgi brıfıng jergilikti ýaqyt boıynsha saǵat 9:00 de ótedi. Oblystyq ákimdik paraqshasynan bólek Habar 24 telearnasynan da tikeleı efırde kórsetiledi.
«Dúrbeleńge salyp, jaǵdaıdy ýshyqtyrmańyzdar. Jalǵan aqparat taratqan adamdarǵa jaza qoldanylatynyn umytpaıyq», - dep eskertedi Aqtóbe oblysy ákiminiń baspasóz hatshysy.
Eske sala keteıik, búgingi tańda Qazaqstanda 59 adam koronavırýs juqtyrǵan. Onyń ishinde Nur-Sultanda – 31, Almatyda – 24, Qaraǵandyda – 2, Almaty oblysynda - 1, Aqtóbe oblysynda 1 jaǵdaı tirkeldi.
