Aqtóbede veterınarlyq zerthana dırektory 2 mln teńgege jýyq para aldy degen kúdikke ilindi

NUR-SULTAN. QazAqparat – Aqtóbe oblysynda veterınarlyq zerthana dırektory men áriptesteri para aldy degen kúdikpen kúzetke alyndy, dep habarlaıdy QazAqparat tilshisi.

Bul týraly Sybaılas jemqorlyqqa qarsy is-qımyl agentiginiń Telegram kanalynda jarııalandy.

«Aqtóbe oblysynda aýyl sharýashylyǵy mınıstrligi veterınarııalyq baqylaý jáne qadaǵalaý komıtetiniń «Respýblıkalyq veterınarııalyq zerthana» sharýashylyq júrgizý quqyǵyndaǵy respýblıkalyq memlekettik kásiporyny oblystyq fılıalynyń dırektory men osy fılıaldyń basqa da qyzmetkerlerine qatysty sotqa deıingi tergeý júrip jatyr.

Atalǵan fılıaldyń laýazymdy tulǵalary aýdandyq veterınarlyq zerthanalardy jóndeý boıynsha oryndalǵan jumystardyń aktilerine kedergisiz qol qoıý úshin merdiger uıymnyń dırektorynan júıeli negizde jalpy somasy 1 mln 800 myń teńgeden astam para aldy degen kúdikke ilindi», - dep jazylǵan málimette.

Agenttik ókilderi kúdiktilerdiń ústinen «kúzetpen ustaý» túrindegi bultartpaý sharasy qoldanylǵanyn aıtady.

Aıta keteıik, Sybaılas jemqorlyqqa qarsy is-qımyl agenttigi ózin pandemııamen kúres jónindegi monıtorıng tobynyń ókili retinde tanystyryp, oıyn-saýyq oryndarynan aqsha bopsalaǵan elordalyq kúdiktiniń ustalǵanyn habarlady.