Aqtóbede «Úzdik kolledj» ataǵyn qaı oqý orny ıelendi
AQTÓBE. KAZINFORM — Aqtóbede «BEST IN AQTÓBE» reıtıngtik jobasynyń І maýsymy qorytyndylandy.
Aqtóbe qalasynyń jastar resýrstyq ortalyǵynyń uıymdastyrýymen tehnıkalyq jáne kásiptik bilim berý uıymdary arasynda ótkizilgen «BEST IN AQTÓBE» reıtıngtik jobasynyń І maýsymynyń qorytyndy marapattaý rásimi ótti. Atalǵan joba Aqtóbe qalasynyń jastar resýrstyq ortalyǵynyń bastamasymen qolǵa alynyp, qaladaǵy tehnıkalyq jáne kásiptik bilim berý uıymdary arasynan úzdikterdi anyqtaýǵa, kolledjderdegi jastar isi jónindegi komıtetterdiń jumysyn jandandyrýǵa jáne bilim berý uıymdary arasynda salaýatty básekelestik ortany qalyptastyrýǵa baǵyttalǵan.
Jobanyń basty maqsaty — jastardyń qoǵamdyq belsendiligin arttyrý, olardyń bastamalaryna qoldaý kórsetý, shyǵarmashylyq áleýetin damytý jáne kolledjder arasyndaǵy ózara yntymaqtastyqty nyǵaıtý.
Joba aıasynda ár aıǵa arnaıy baǵyttar men taqyryptar belgilenip, qatysýshy kolledjder sol baǵyttar boıynsha túrli is-sharalar men bastamalardy júzege asyrdy. Atap aıtqanda: Qarasha — qaıyrymdylyq aıy; Jeltoqsan — rýh pen patrıotızm aıy; Qańtar — jańarý men ıdeıalar aıy; Aqpan — dostyq pen yntymaq aıy; Naýryz — mádenıet pen dástúr aıy; Sáýir — «Eko aı: Taza qala, taza sana»; Mamyr — jetistikterdi qorytyndylaý jáne úzdikterdi anyqtaý aıy.
Joba barysynda kolledjderdiń atqarǵan jumystary, qoǵamdyq belsendiligi, is-sharalardy uıymdastyrý deńgeıi, tyń bastamalary men jastardy ortaq iske jumyldyrý qabileti baǵalandy. Ár baǵyt boıynsha arnaıy baldyq júıe engizilip, qorytyndy reıtıng jınaqtalǵan upaılar negizinde anyqtaldy. Bir maýsymnyń ózinde «BEST IN AQTÓBE» jobasy aıasynda kolledjder 300-den astam is-shara uıymdastyrdy. Bul kórsetkish bilim berý uıymdarynyń qoǵamdyq jumysqa belsendi aralasqanyn, jastardyń bastamashyldyǵy men shyǵarmashylyq áleýetiniń artqanyn aıqyn kórsetedi.
Sonymen qatar joba úzdik tájirıbelerdi kópshilikke tanytýǵa, kolledjder arasyndaǵy tájirıbe almasýdy damytýǵa jáne jastardyń qoǵamdyq ómirge qatysýyn keńeıtýge múmkindik berdi.
Joba qorytyndysy boıynsha belsendilik tanytyp, jastar bastamalaryn damytýǵa qosqan úlesi men qoǵamdyq jumystardaǵy jetistikteri úshin birqatar bilim berý uıymdary marapattaldy.
Atap aıtqanda: Aqtóbe kólik, baılanys jáne jańa tehnologııalar kolledji; Aqtóbe ónerkásiptik tehnologııalar jáne basqarý kolledji; Aqtóbe joǵary mýltıprofıldik kolledji; «ALT Aqtóbe gýmanıtarlyq-tehnıkalyq kolledji».
Sonymen qatar arnaıy nomınatsııalar boıynsha úzdikter anyqtaldy. «Úzdik uıymshyl komanda» nomınatsııasynyń ıegeri — Keńes Odaǵynyń Batyry Mánshúk Mámetova atyndaǵy Aqtóbe joǵary medıtsınalyq kolledji, «Úzdik medıa» nomınatsııasynyń ıegeri — DÚNIE kolledji. «BEST IN AQTÓBE» reıtıngtik jobasynyń úzdik bestigine engen bilim berý uıymdary arasynda: «Úzdik joba» nomınatsııasy — Eset batyr atyndaǵy olımpıada rezerviniń oblystyq mamandandyrylǵan mektep-ınternat-kolledji; «Úzdik belsendi orta» nomınatsııasy — Aqtóbe qurylys-montaj kolledji.
Jeke nomınatsııalar boıynsha da úzdikter marapattaldy. «Úzdik stýdent» nomınatsııasynyń ıegeri — Aqtóbe avtojol kolledjiniń stýdenti Abdrahman Islambek Temirbekuly, «Úzdik jastar isi jónindegi komıtet tóraǵasy» nomınatsııasynyń ıegeri — Aqtóbe servıs kolledjiniń jastar isi jónindegi komıtet tóraǵasy Bekmuhambetova Botakóz Saǵynǵanqyzy.
Al tehnıkalyq jáne kásiptik bilim berý uıymdary arasynda ótken «BEST IN AQTÓBE» reıtıngtik jobasynyń І maýsymyndaǵy eń joǵary marapat — «Úzdik kolledj» nomınatsııasy Shyǵanaq Bersıev atyndaǵy Aqtóbe joǵary agrarlyq-tehnıkalyq kolledjine tabystaldy. Osylaısha, kolledj joba maýsymynyń jeńimpazy atandy.
«BEST IN AQTÓBE» jobasynyń alǵashqy maýsymy jastardyń belsendiligin arttyrýǵa, bilim berý uıymdarynyń qoǵamdyq jumystaryn jańa deńgeıge kóterýge jáne kolledjder arasyndaǵy yntymaqtastyqty nyǵaıtýǵa baǵyttalǵan mańyzdy bastama ekenin kórsetti.
Aldaǵy ýaqytta joba óz jalǵasyn taýyp, jańa ıdeıalarmen, tyń bastamalarmen jáne jarqyn jetistiktermen tolyǵa túspek.
